Қарши шаҳрининг Алишер Навоий кўчасида жойлашган сув қувури ёрилганлиги сабабли уч-тўрт ойдан бери ичимлик суви беҳуда исроф бўлмоқда. Натижада кўчада лойгарчилик, қатнов учун эса ноқулайликлар юзага келган. Бу ҳақда журналист Отабек Қўлдошев маълум қилди.
«Бир томчи сув олтинга тенг бўлган вилоятда ичимлик сувининг бу ҳолда исроф бўлиши яхши эмас-да, — дейди ўзини кўча боши дея таништирган отахон Ҳасан бобо Мансуров. – Беш-олти ойдан бери кўчамизда труба ёрилганлиги сабабли ичимлик суви «денгиз» бўлиб оқаяпти. Агар менинг хонадонимдан бир томчи сув беҳуда оқсин, «водоканал»дагилар югуриб келиб, жарима тўланг дейишни билади-ку қаламининг учини чиқариб. Нега энди бундай пайтларда уларга тезкорлик етишмайди».
Ҳасан бобо Мансуров Алишер Навоий ва унга туташ бўлган Ойбек кўчасининг бугунги аҳволи аҳолини қониқтирмаётганини билдирар экан, «Ҳар иккала ҳоким ҳам (вилоят ва Қарши шаҳар ҳокимлари назарда тутилмоқда) шу кўчадан юради-ку, наҳотки эътибор беришмаса, – дейди. – Агар худо раҳматлилар тирик бўлганида уларнинг номи шундай абгор кўчаларга берилганини билса, менинг номим шу кўчаларга лойиқми демасмиди?».
Ушбу кўчада истиқомат қилувчи Сайёра Ҳамраеванинг маълум қилишича, ушбу ҳолатни бартараф қилиш учун аҳоли вакиллари дастлаб маҳалла раиси, сўнгра шаҳар ҳокими ва ҳудуддан сайланган депутатга ҳам мурожаат қилишган. Аммо ҳеч кимдан нажот бўлмаган.
«Аввал маҳалла раисига мурожаат қилдик, – дейди Сайёра Ҳамраева. – Сўнгра шаҳар ҳокимининг қабулида бўлдик. Ҳоким ҳозир одам бориб, сувни тўхтатади деди-ю, аммо ҳеч кимни юбормади. Ҳоким қабулига 2018 йилнинг 20 декабрь куни борган эдик. Мана ҳозиргача сув оқишдан тўхтагани йўқ».
«Кўчанинг лойгарчилиги боис этик кийиб юришга мажбур бўлаяпмиз, – дейди Муаззам Мирзаева. – Шу аҳволда яшаётганимизга ҳам уч ойдан ошди. Қачон бу ҳолат бартараф қилинади?»
«Алишер Навоий кўчасидаги носозлик ҳақиқатдан ҳам икки-уч ойлик муаммо, – дейди вилоят «Сувоқова» унитар корхонаси бош муҳандиси Баҳром Мирзаев. – Муаммонинг чўзилиб кетишига сабаб шу бўлдики, қувур материали бошқача бўлганлиги сабабли унга мос хомутни топиш қийин кечди. Айни кунда хомут Тошкент шаҳридан келтирилган. Тез кунда ўрнатилади».
«Сувни тежанг дейишади, аммо бундай ҳолатда қандай қилиб сувни тежашимиз мумкин, – дейди ўзини Зулфия Зайниддинова дея таништирган суҳбатдош. – Кўз ўнгимизда ичимлик сувининг исроф бўлишига қараб туриш қийин бўларкан».
Вилоят «Сувоқова» унитар корхонаси масъулининг сўзларига кўра, мазкур қувур таъмирланиши учун шаҳар марказидаги кўплаб корхона ва ташкилотларга узатилаётган ичимлик суви вақтинча тўхтатилади.
«Натижада «Маҳтумқули», «Кат» маҳаллалари аҳолиси, аэропорт томон ва Қарши ёғ экстарксия заводи ҳам сувсиз қолиши мумкин, – дейди Баҳром Мирзаев. – Шунинг учун бу борада ҳокимият вакиллари билан маслаҳатлашган ҳолда иш тутишимиз керак бўлади».
Мутасаддининг айтишича, муаммо 1 февраль кунига қадар бартараф этилади.
Изоҳ (0)