Жорий йилнинг 23 январь куни жиноят ишлари бўйича Бухоро вилоят Вобкент туман судида Ўзбекистон Республикаси Жиноят Кодексининг 186-моддаси 4-қисми »а, б» бандлари (хавфсизлик талабларига жавоб бермайдиган хизматлар кўрсатиш натижасида одамлар ўлими ва оғир оқибатларга олиб келиш), 228-моддаси 2-қисми «а, б» бандлари (бир гуруҳ шахслар томонидан такроран ҳужжатларни қалбакилаштириш) ва 228-моддаси 3-қисми (ҳужжатнинг қалбаки эканлигини била туриб ундан фойдаланиш) билан Шаропов Учқун Толибович, Яхшиев Умрзоқ Ҳамроевич, Нарзуллаев Сарвар Ғайбуллаевич, Тошев Бобир Ғайбуллаевич ва Розиқов Намоз Шавкатовичларнинг иши юзасидан суд жараёни бошланди. Суд мажлисининг дастлабки кунида давлат айбловчиси томонидан судланувчиларга нисбатан тузилган айблов хулосасини ўқиб эшиттириб, судланувчилар ва жабрланувчиларнинг кўрсатмалари тингланди. Бу ҳақда жиноят ишлари бўйича Бухоро вилоят Вобкент туман суди матбуот хизмати «Дарё»га маълум қилди.
Воқеа тафсилоти: 2018 йил 18 сентябрь куни соат тахминан 7:30 ларда AСГTКШга келган фуқаро В.Қобилов бошқарувидаги Isuzu русумли давлат белгиси 80 Й 120 КА рақамли аҳолига транспорт хизмати кўрсатувчи автобусга белгиланган 200 КПа меъёридан ортиқча босимда газ тўлдириб, истеъмолчиларнинг ҳаёти ва соғлиғи хавфсизлиги талабларига жавоб бермайдиган хизмат кўрсатиб, автомашинага ўрнатилган газ баллони юқори босимда газ тўлдириши натижасида, автобус ҳайдовчиси В.Қобилов шохобча олдида кутиб турган йўловчиларни автомашинага миндириб, шохобчадан чиқиб тахминан 1 км.гача бўлган масофа юргандан сўнг, Когон тумани ҳудудидан ўтган А-380 автомобиль йўлининг «Когон-Қоровулбозор» йўналишида ҳаракатланиб кетаётганида, 201 км.да газ баллони портлаганлиги натижасида автобус салонида бўлган йўловчилар Н.Жумаева, Г.Розиқова, Р.Саъдуллоева, Ф.Эргашевалар воқеа жойида, Ҳ.Жумаева Когон шаҳар тиббиёт бирлашмасида вафот этишган, ҳайдовчи В.Қобилов оғир, қолган йўловчилар Ф.Ботирова ўртача оғир, А.Насуллоев, С.Жўрақулова, М.Жабборова, Ф.Атоева, С.Жўрақулова, М.Саноев, В.Эргашев, Г.Розиқова, А.Шоҳназарова, Г.Розиқова, Х.Ўринова, М.Бегмуродовалар енгил жароҳат олганлар ҳамда автобус шикастланиши натижасида унинг эгаси В.Қобиловга 58 226,2 минг сўмлик моддий зарар етказиб, одамлар ўлимига ва бошқа оғир оқибатларнинг келиб чиқишига сабабчи бўлган.
Ўзбекистон Республикаси Вазирлар Маҳкамасининг 2018 йил 18 сентябрдаги 763-ф-сонли қарори қабул қилиниб, қарорга кўра Ўзбекистон Республикаси Бош Вазири ўринбосари Н.С.Отажонов раислигада комиссия тузилиб, комиссия зиммасига ушбу фожиа содир қилинишига олиб келган сабабларни ўрганиш, вафот этганлар ва жароҳатланганларга ҳар томонлама ёрдамлар кўрсатиш ишлар амалга оширилган эди.
Ўз навбатида Бухоро вилоят ҳокимининг 2018 йил 19 сентябрдаги 291ф-сонли фармойиши қабул қилиниб, мазкур фожиа натижасида ҳалок бўлганларнинг оилаларига 10 000 000 сўмдан, жароҳат олганларга 5 000 000 ва 2 000 000 сўмдан моддий ёрдамлар кўрсатилган эди.
Суд мажлисига 2018 йил 30 январга қадар танаффус эълон қилинди.
Изоҳ (0)