Ироқлик геолог олим Сулаймон ал-Афари 2014 йил жангарилар у яшаб турган шаҳар Мосулни ишғол қилганида, ИШИД террористик гуруҳига кимёвий қурол тайёрлашга ёрдам берган, дея хабар беради The Washington Post.
2014 йил ал-Афари Республика саноат ва минерал ресурс вазирлигида ишлаган. Ҳозирда 52 ёшлик олим Ироқ Курдистонидаги қамоқда сақланмоқда. У террористлар учун 15 ой давомида иприт (теккан ерни яра қиладиган ва умуман заҳарлайдиган рангсиз, мойсимон заҳарли модда) ишлаб чиқаришга ёрдам берган.
«Улар ҳокимият тепасига келди, биз эса уларга ишлай бошладик. Биз пул учун ишлаганмиз. Улар ҳеч кимни мажбур қилмаган. Қилган ишимдан афсусланаманми? Билмадим,» — дейди ал-Афари ўлим жазосини кутаркан.
Олимнинг сўзларига кўра, унинг гуруҳида бошқа мутахассислар ҳам бўлган. Улар билан университет лабораторияларида кимёвий қуроллар ишлаб чиқилган ва оддий фуқароларга қарши ишлатилган. Жангарилар томонидан ишлатилган иприт юзлаб одамларнинг ўлимига сабаб бўлган.
Ироқдаги кимёвий қурол ишлаб чиқарадиган ИШИД лабораториялари кейинчалик ёпилган. Лекин жангарилар кимёвий қуролларни Сурияга яширинча олиб ўтишган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)