Iroqlik geolog olim Sulaymon al-Afari 2014-yil jangarilar u yashab turgan shahar Mosulni ishg‘ol qilganida, IShID terroristik guruhiga kimyoviy qurol tayyorlashga yordam bergan, deya xabar beradi The Washington Post.
2014-yil al-Afari Respublika sanoat va mineral resurs vazirligida ishlagan. Hozirda 52 yoshlik olim Iroq Kurdistonidagi qamoqda saqlanmoqda. U terroristlar uchun 15 oy davomida iprit (tekkan yerni yara qiladigan va umuman zaharlaydigan rangsiz, moysimon zaharli modda) ishlab chiqarishga yordam bergan.
“Ular hokimiyat tepasiga keldi, biz esa ularga ishlay boshladik. Biz pul uchun ishlaganmiz. Ular hech kimni majbur qilmagan. Qilgan ishimdan afsuslanamanmi? Bilmadim,” — deydi al-Afari o‘lim jazosini kutarkan.
Olimning so‘zlariga ko‘ra, uning guruhida boshqa mutaxassislar ham bo‘lgan. Ular bilan universitet laboratoriyalarida kimyoviy qurollar ishlab chiqilgan va oddiy fuqarolarga qarshi ishlatilgan. Jangarilar tomonidan ishlatilgan iprit yuzlab odamlarning o‘limiga sabab bo‘lgan.
Iroqdagi kimyoviy qurol ishlab chiqaradigan IShID laboratoriyalari keyinchalik yopilgan. Lekin jangarilar kimyoviy qurollarni Suriyaga yashirincha olib o‘tishgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)