Афинада 60 мингга яқин киши Скопье билан битимга қарши намойишга чиқди

Афина марказидаги Синтагма майдонида бўлиб ўтган митингда 60 минг киши қатнашмоқда, деб ёзади «РИА Новости» Греция полициясига таяниб. Бу ташкилотчилар ҳисоб-китобидан ўн марта камроқ демакдир.

Афинага митинг ўтказувчилар 326 та автобусда етиб келган.

Ташкилотчилар пойтахтга 3 мингта автобус келишини, митингга эса камида 600 минг киши йиғилишини маълум қилган эди.

Тартибсизликлар билан ўтаётган намойиш Македония номи ҳақидаги баҳсга нуқта қўювчи, Скопе билан Преспа битимига қарши қаратилган, у Скопье учун НАТО ва Евроиттифоққа йўл очади, аммо ҳам Греция, ҳам Македонияда танқидга сабаб бўлмоқда.

Грециядагилар фикрича, македонияликлар деб қўшни давлат эмас, балки фақат мамлакат шимолий қисмидаги тарихий ҳудуд аҳолиси аталиши мумкин. Скопьедагилар фикрича эса, мамлакатни Шимолий Македония Республикаси деб номлаш имконини берувчи битим халқнинг миллий тенглигини бузади.

Аввалроқ Афина марказидаги Греция парламенти биноси яқинида юз берган тартибсизликлар чоғида ўн нафар полициячи яралангани хабар берилган эди.