15 январь куни «Ўзбеккино» Миллий агентлиги Бадиий кенгашининг навбатдаги йиғилишида кенгаш томонидан «Авто саргузаштлар» мультфильми муҳокама қилинган эди. Бу ҳақда «Халқ сўзи» хабар бермоқда.
«Ўзбеккино» Миллий агентлиги буюртмасига биноан «Astir Animation Studio» корхонаси постановкачи режиссёр Абдулатиф Ҳайдаров бошчилигида «Авто саргузаштлар» номли 3D анимацион фильмлар туркуми яратилди. 3D анимацион фильм ижодкорлари 2018 йилда ишлаб чиқариш мўлжалланган олтита қисмига 11 ой вақт сарфлади. Мультфильмнинг ҳар бир қисми давомийлиги 3-4 дақиқани ташкил қилади. «Авто саргузаштлар» мультфильмини яратишда 15-20 нафарга яқин мутахассислар ижод қилди.
Фильмда ўзбек автомобиллари мультқаҳрамонлар қиёфасида намоён бўлган. Мультфильм қаҳрамонларининг қиёфаси иллюстратор, рассом ва мультфильмнинг саҳналаштирувчи рассоми Зилола Ҳамидова томонидан яратилган.
Қувноқ автомобиллар яшайдиган замонавий шаҳар моделлаштирилишида меъморий жиҳатдан миллийлик ва замонавийлик уйғунлаштирилган бўлиб, бунда барчага таниш бўлган бино ва иншоотлар, музейлар, масжидлар, меҳмонхоналар, яқин йилларда қурилиши тамомланадиган Tashkent City мажмуаси ва бошқа диққатга сазовор жойларнинг мультфильм учун мослаштирилган 3D кўринишини учратасиз.
Мультфильмнинг энг асосий ютуқларидан бири — унинг анимацияси. Фильмда динамика жуда кучли, ҳаракатлар тезлиги чет эл 3D мультфильмларидан қолишмайдиган даражага олиб чиқилган. Биринчи яратилган олтита қисмда мультфильм воқеалари марказида кичкинтой Matiz. Шу билан бирга, унинг оиласи ва яқин дўстлари ҳам эътибордан четда қолмаган. Улар кечираётган саргузаштлар кичкинтой телетомошабинлар учун нафақат қизиқарли, балки тарбиявий аҳамиятга ҳам эгадир.
«Astir Animation Studion» бу лойиҳа доирасида 2018 йилда бажарилган бошқа лойиҳаларга нисбатан икки баробар кўпроқ иш ҳажмини бажарди деса муболаға бўлмайди. Шу пайтгача Ўзбекистонда 10 дақиқалик мультфильм яратишга 1 йил ёки ундан кўпроқ вақт сарфлаган бўлса, «Astir Animation Studio» жамоаси ишга замонавий ёндашуви натижасида 11 ойда 20 дақиқадан кўп юқори сифатли мультфильм ишлади. Бу ўн йиллик даври ичида энг тез, сифатли ва самарадор ишлаган студия десак адашмаган бўламиз.
Мультфильмнинг овозлаштириш жараёнига ҳам катта эътибор қаратилган бўлиб, ҳар бир қаҳрамонга энг машҳур актёрлар моҳирлик билан овоз беришган. Мультфильм бош қаҳрамони матизга маҳоратли актриса Санобар Содиқова овоз берган. Сиз фильмда Санжар Саъдуллаев, Ойбарчин Бакирова, Маҳмуд Исмоилов, Лазиза Аслзода, серқирра актёр Акбархўжа Расулов, 2018 йилнинг энг яхши актрисаси Зилола Ғуломова, Гулноза Жуманазарова, Рустамбек Насриддинов, Аҳрор Алижонов, Ҳабибулла Ортиқов, Ҳамза Хасановлар ўз ишларини аъло даражада уддалашганини кўришингиз мумкин. Мультфильмнинг футбол мухлислари учун ҳам қизиқарли жиҳати бор бўлиб, мультфильм қисмларидан бирида жонли тарзда таниқли шарҳловчи Мирзаҳаким Тўхтамирзаев шахсан ўзлари шиддатли ўйинни шарҳлаган.
Изоҳ (0)