16 январнинг эътиборга молик янгиликлари — «Дарё» дайжестида.
15 январь куни Олий Мажлис Сенати 100000 (юз минг) сўмлик банкнот намунаси ва дизайнини маъқуллади.
100 000 (юз минг) сўм қийматдаги банкнотлар жорий пул массаси доирасида чиқарилади ҳамда унинг ўсишига таъсир кўрсатмайди.
Янги номиналдаги банкнотнинг кўриниши, таснифи ва чиқарилиш санаси Марказий банк томонидан оммавий ахборот воситаларида эълон қилинади.
***
Бир кунга интернет блокланиши Ўзбекистонга қарийб 32 млн долларга тушади.
Ўзбекистонда бир кунга бутун интернетни блоклаш 31 726 524 АҚШ долларга тушади. Таққослаш учун ушбу кўрсаткич Қозоғистонда 169 560 004 АҚШ доллар, Россияда эса 307 379 499 АҚШ долларга тушади.
***
Хитойнинг Ойда юрувчи «Чанъэ-4» зонди Ойда биологик тадқиқот ўтказди ва пахта ниҳоли акс этган суратни жўнатди. Инсоният биринчи марта Ер ёнидаги осмон жисмида ўсимлик ўстиришга муваффақ бўлди.
***
Қаршида коллеж ўқувчиси қиз бола танишини дўппослади. Жабрланувчи маст ҳолатда шифохонага олиб келинган.
2000 йилда туғилган Б.М. Қарши транспорт касб-ҳунар коллежининг 3-босқич ўқувчиси бўлиб, Нишон туманида яшаб келган. У 11 январь куни ўзига олдиндан таниш бўлган Косон туманида яшовчи қиз бола таниши М.Б. билан ўзаро тортишиб қолган ва унинг юз, бош ҳамда танасининг турли жойларига қўллари билан уриб, жароҳат етказади.
Бемор ўша куни операция қилинган. 15 январь куни эса қолган даво муолажаларини давом эттириш учун палатага олинган. Шифокорнинг қўшимча қилишича, шифохонага олиб келинган пайтда жабрланувчи маст ҳолатда бўлган.
***
Хориж валютасини ноқонуний равишда айирбошлаш учун жарималар миқдори оширилди.
«Иқтисодий жиноятларга ва оммавий қирғин қуролини тарқатишни молиялаштиришга қарши курашиш механизмлари такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги Қонунга асосан фуқароларнинг қонунга хилоф равишда валюта қимматликларини олиши ёки ўтказиши шундай ҳаракатлар учун маъмурий жазо қўлланилганидан кейин содир этилган бўлса, энг кам ойлик иш ҳақининг 75 бараваридан 100 бараваригача миқдорда жарима ёки икки йилдан уч йилгача ахлоқ тузатиш ишлари ёхуд бир йилгача озодликни чеклаш ёки бир йилгача озодликдан маҳрум қилиш билан жазоланади.
Изоҳ (0)