16-yanvarning e’tiborga molik yangiliklari — “Daryo” dayjestida.
15-yanvar kuni Oliy Majlis Senati 100000 (yuz ming) so‘mlik banknot namunasi va dizaynini ma’qulladi.
100 000 (yuz ming) so‘m qiymatdagi banknotlar joriy pul massasi doirasida chiqariladi hamda uning o‘sishiga ta’sir ko‘rsatmaydi.
Yangi nominaldagi banknotning ko‘rinishi, tasnifi va chiqarilish sanasi Markaziy bank tomonidan ommaviy axborot vositalarida e’lon qilinadi.
***
Bir kunga internet bloklanishi O‘zbekistonga qariyb 32 mln dollarga tushadi.
O‘zbekistonda bir kunga butun internetni bloklash 31 726 524 AQSh dollarga tushadi. Taqqoslash uchun ushbu ko‘rsatkich Qozog‘istonda 169 560 004 AQSh dollar, Rossiyada esa 307 379 499 AQSh dollarga tushadi.
***
Xitoyning Oyda yuruvchi “Chane-4” zondi Oyda biologik tadqiqot o‘tkazdi va paxta niholi aks etgan suratni jo‘natdi. Insoniyat birinchi marta Yer yonidagi osmon jismida o‘simlik o‘stirishga muvaffaq bo‘ldi.
***
Qarshida kollej o‘quvchisi qiz bola tanishini do‘pposladi. Jabrlanuvchi mast holatda shifoxonaga olib kelingan.
2000-yilda tug‘ilgan B.M. Qarshi transport kasb-hunar kollejining 3-bosqich o‘quvchisi bo‘lib, Nishon tumanida yashab kelgan. U 11-yanvar kuni o‘ziga oldindan tanish bo‘lgan Koson tumanida yashovchi qiz bola tanishi M.B. bilan o‘zaro tortishib qolgan va uning yuz, bosh hamda tanasining turli joylariga qo‘llari bilan urib, jarohat yetkazadi.
Bemor o‘sha kuni operatsiya qilingan. 15-yanvar kuni esa qolgan davo muolajalarini davom ettirish uchun palataga olingan. Shifokorning qo‘shimcha qilishicha, shifoxonaga olib kelingan paytda jabrlanuvchi mast holatda bo‘lgan.
***
Xorij valyutasini noqonuniy ravishda ayirboshlash uchun jarimalar miqdori oshirildi.
“Iqtisodiy jinoyatlarga va ommaviy qirg‘in qurolini tarqatishni moliyalashtirishga qarshi kurashish mexanizmlari takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi Qonunga asosan fuqarolarning qonunga xilof ravishda valyuta qimmatliklarini olishi yoki o‘tkazishi shunday harakatlar uchun ma’muriy jazo qo‘llanilganidan keyin sodir etilgan bo‘lsa, eng kam oylik ish haqining 75 baravaridan 100 baravarigacha miqdorda jarima yoki ikki yildan uch yilgacha axloq tuzatish ishlari yoxud bir yilgacha ozodlikni cheklash yoki bir yilgacha ozodlikdan mahrum qilish bilan jazolanadi.
Izoh (0)