2019 йилнинг 14 январь куни Сирдарё вилоятининг Гулистон шаҳрида вилоят ҳокими ўринбосари Ж.Ибраҳимов раислигида аҳоли хонадонларида иситиш тизими ва ёқилғи маҳсулотларидан фойдаланишда хавфсизлик талабларига риоя этилишини таъминлаш борасида амалга оширилаётган ишлар ва юзага келаётган камчиликларга бағишланган йиғилиш бўлиб ўтди. Бу ҳақда Сирдарё вилояти ИИБ ЁХБ хабар берди.
Йиғилишда вилоят ҳудудидаги 221 та маҳаллалардаги ҳар бир аҳоли турар жойлари ва объектлар кўрикдан ўтказилишига эътибор қаратилиб, газ ва электр мосламалари хавфсизлик қоидалари талабларига мувофиқлиги, иситиш печларининг мўриконларини созлиги, носоз, қўлбола ва ўзбошимчалик билан ўрнатилган газ ва электр ускуналаридан фойдаланиш қоидаларига риоя қилинаётганига алоҳида эътибор қаратилиши қайд этилди.
Ўрганишлар даврида 12 минг 334 та камчиликлар аниқланиб, шулардан 8 минг 663 таси бартараф этилди қолган камчиликларни бартараф этилишини мутасаддилар томонидан назоратга олинди.
Вилоят ҳудудидаги 568 та давлат тасарруфидаги объектларда ўтказилган текширувлар ҳамда 134 та тадбиркорлик субъектида ўтказилган ёнғин-профилактика кўригида 830 та ёнғинга қарши камчиликлар аниқланиб, шулардан 540 таси бартараф этилган.
Текширувлар давомида ёнғин хавфсизлиги қоидаларини бузаётган 97 нафар фуқаролар 2,1 миллион сўм миқдорида маъмурий жавобгарликка тортилиб, ёнғин содир бўлишига олиб келиши мумкин бўлган 380 та электр ускуна, мослама ва агрегатлардан фойдаланиш тақиқланди.
Изоҳ (0)