Ўзбекистонда Атом электростанцияси (АЭС) қурилиши тинч атом энергияси жаҳон элита клубига қўшилиш имконини беради, деб ёзмоқда Spot «Ўзатом» раҳбари Жўрабек Мирзамаҳмудовнинг Financial Times’га берган интервьюсига таяниб.
«Биз тинч атом энергияси мамлакатлари клубига қўшиламиз. У элита клуб ҳисобланади. Бу бутунлай янги даража, янги турдаги муносабатлар, янги технологиялар, фан ва таълим ривожланиши», — дейди Мирзамаҳмудов.
Хабарда айтилишича, Россия фанлар академиясига қарашли Шарқшунослик институтининг Марказий Осиё, Кавказ ва Урал—Волга минтақаларини ўрганиш маркази илмий ходими Станислав Притчин Ўзбекистон минтақада ўз АЭСига эга бўлган мамлакат бўлишини айтган. Унинг фикрича, АЭС қурилиши нафақат мамлакат обўсини оширади, балки бир қатор муаммоларни ҳал этади.
Прогнозларга кўра, АЭСга энергия балансининг 15 фоизи тўғри келади. Бу эса энергияга бўлган талаб икки баробар ошганда ҳам уни бир маромда таъминлаш имконини беради.
АЭС қурилиши 2022 йилда бошланади ва 2028 йилда ишга туширилади.
Изоҳ (0)