15 январь куни Юнусобод туманидаги 7-сонли ички ишлар бўлимида Тошкент шаҳар ИИББ бошлиғи Рустам Жўраев иштирокида ОАВ ходимлари учун брифинг ташкил этилди. «Дарё» мухбири Севара Нишонова Рустам Жўраев томонидан келтирилган маълумотларнинг асосийларига эътибор қаратди.
Жиноятчилик сезиларли даражада камайди
2018 йилда ҳокимият, мудофаа, фавқулодда вазиятлар вазирликлари, прокуратура, маҳалла, миллий гвардия, давлат хавфсизлик хизмати билан олиб борган чора-тадбирларимиз натижасида Тошкент шаҳрида жиноятчилик 49 фоизга камайди. 2018 йилда 4969 та жиноят қайд этилган. Қотиллик, қасддан баданга оғир тан жароҳати етказиш, номусга тегиш каби жиноятлар камайди. Талончилик 51 фоизга камайди. Яъни 2017 йилда 245 та талончилик жинояти содир бўлган бўлса, 2018 йилда 120 тани ташкил этди.
Босқинчилик 52,9 фоизга камайиб, 136 та кўрсаткичдан 64 тага тушган.
Тошкент шаҳрида энг кўп кузатиладиган жиноятлар ўғрилик ва фирибгарлик ҳисобланади. 2018 йилда ушбу жиноятлар ҳам сезиларли даражада камайган. Ўғрилик 1969 тадан 947 тага ёки 51,9 фоизга, фирибгарлик 2420 тадан 1296 тага ёки 46,5 фоизга камайди. Оқибати ўлим билан якунланган ЙТҲлар 194 тадан 128 тага ёки 34 фоизга камайди.
2018 йилда Тошкентдаги 7 та маҳаллада умуман жиноят содир этилмади
Пойтахтдаги 7 та маҳаллада умуман жиноят содир этилмаган, шу билан бирга ушбу маҳаллаларда яшовчи аҳоли томонидан ҳам умуман жиноят содир этилмаганлиги аниқланди. Юнусобод туманидаги Катта Ҳасанбой, Боғи Эрам, Учтепа туманидаги Жарбулоқ, Тепақўрғон, Чилонзор туманидаги Гавҳар, Сергели туманидаги Шукрона маҳаллалари намунали маҳаллалар деб топилди.
2018 йилда Тошкент шаҳар ИИББ бўлинмалари 150 та скутер, видеокузатув тизими ва интеллектуал камералар ўрнатилган 73 та Isuzu, 73 та Damas ва Nexia автомобиллари билан таъминланди.
Тошкент шаҳрида 30 мингтадан ортиқ кузатув камералари ўрнатилди
2018 йилда 743 та фош этилган ўғриликларнинг 248 таси ёки 33,5 фоизи мана шу кузатув камералари ёрдамида фош қилинган.
Шаҳар бўйича тажриба сифатида 10 та радар иш фаолиятини олиб бормоқда. Улардан 6 таси стационар ва 4 таси мобил радарлар.
Стационар радарни ҳайдовчилар томонидан тезлик ошириладиган ҳудудга қўямиз, ҳайдовчилар ўрганиб қолганидан кейин секингина радарни олиб бошқа жойга қўйиб қўямиз. Лекин бу жойда ҳам ҳайдовчилар тезликни оширмай юраётганига гувоҳ бўляпмиз. Бу қувонарли ҳолат албатта.
Бор-йўғи 10 та радар ёрдамида 42 миллиард сўмдан ортиқ жарима ундирилган. Энди ўзингиз ўйлаб кўринг, шаҳарда бундай камералардан 10 та эмас, 100 та бўлса. Бизни пул қизиқтирмаяпти. Сездингларми, биз радар ўрнатганимизни ҳайдовчилардан яшираётганимиз йўқ? Одамларнинг «Буларнинг мақсади, яшириниб олиб пул қилиш» деган гапи бизга керакмас.
Радар ёзувли белгили ўрнатяпмиз. Лекин уям шарт эмас, шаҳарда чегараланган тезлик 70.
Ўтган йили киритилган янгиликлардан бири биллинг тизими. Авваллари 40 дан ортиқ қоидабузарлик бўйича ҳайдовчилик гувоҳномаси олиб қўйилган бўлса, ҳозирда фақат 13 та қоидабузарлик содир этилганида ҳайдовчилик гувоҳномаси олиб қўйилмоқда. Бу эса ўз навбатида ИИБларда юзага келадиган узундан-узоқ навбатларнинг олдини олмоқда.
Ички ишлар тизимига ишга қабул қилиш тизими ўзгарди
Ҳозирда биз кадр бошқармасини ИИБ биносидан ташқарига чиқариб, Тошкент шаҳар ички ишлар органларига ишга қабул қилиш марказини ташкил этдик. Ишга кирмоқчи бўлган фуқаро ота-онаси билан бемалол келади, ҳеч қандай текширув ва назоратсиз бемалол марказга кириб, керакли консултацияни олади. Номзодларни хизматга саралаш ва қабул қилиш муддатини олти-саккиз ойдан бор-йўғи 40 кунга камайтирдик.
Тошкент шаҳар ИИББ вертолётлар билан таъминланади
Президент 7-сонли ички ишлар бўлинмасига ташриф буюрган пайтида Тошкент шаҳар ички ишлар бош бошқармасига вертолётлар ажратиш тўғрисида топшириқ берди. Бунинг учун озгина вақт керак. Вертолёт машина эмас, уни олиб миниб кетадиган. Унга хизмат кўрсатиш, учувчилар, дислокация масалаларини ҳал қилиш керак. Ҳозирги кунда мана шу масалалар устида ишлаяпмиз.
Бу керак деб ўйламан, нимага деганда ҳамма ривожланган мамлакатлар пойтахтларида вертолётлар бор. Тез тиббий ёрдам кўрсатиш, тез воқеа жойига бориш, жиноятчини ушлашда албатта вертолётларнинг ўрни беқиёс. Бу давлат учун ҳам обрў.
Шахсий таркиб интизомини шакллантиришга алоҳида эътибор қаратилмоқда
Шахсий таркиб интизоми, қонунчиликка ўзи риоя этишига ҳам алоҳида эътибор қаратилмоқда. Раҳбарларнинг назорати қай даражада ўрнатилгани, ходимнинг онги, ишга муносабати муҳим. Ҳозирда ИИБ тергов хоналарининг барчаси камералар билан таъминланмоқда. Бундан ташқари, терговчиларнинг ўзида ҳам камера бор. Бу турли провокацион ҳолатларнинг олдини олиш мақсадида амалга оширилган. Биз ҳар доим шахсий таркибга «Қўл билан эмас, калла билан ишланглар!» деб тайинлаймиз. Ишни очаман деб бировни уриб, унга руҳий тазйиқ ўтказиш мумкин эмас. «Майли жиноят бугун очилмасин, бир ҳафтадан кейин очилади, лекин тегинманглар, фақат яхши гапиринглар! Ақл билан, мия билан ишланглар!», — деймиз.
Изоҳ (0)