Эндиликда Davreestr.uz ахборот-ресурс порталида Тошкент шаҳри бўйича кўчмас мулк Давлат реестиридан кадастр корхонаси ёки Давлат хизматлари марказларига мурожаат қилмаган ҳолда онлайн тарзда маълумотнома олиш имконияти яратилди. Бу ҳақда «Давергеодезкадастр» қўмитасининг Telegram’даги расмий канали хабар берди.
Davreestr.uz портали орқали Давлат реестридан маълумотнома олиш учун ONE ID — ягона идентификация ва аутентификация тизими орқали рўйхатдан ўтиш, белгиланган шаклга ўзингизни қизиқтирган объектнинг кадастр рақамини киритиш лозим бўлади.
Тайёр маълумотнома шахсий кабинет орқали PDF форматда юклаб олинади. Маълумотнома электрон имзо билан тасдиқланган бўлиб, маълумотлар ҳаққонийлигини QR код орқали текшириш имконияти мавжуд.
Давлат реестридан берилган маълумотномада ҳар қандай турдаги кўчмас мулк объекти тўғрисида қуйидаги маълумотлар акс этади:
1. Кўчмас мулк объектини рўйхатга олиш вақтида бириктирилган ноёб кадастр рақами ва аниқ жойлашган манзили.2. Кўчмас мулкка бўлган ҳуқуқ ва ҳуқуқ рўйхатдан ўтказилган сана.3. Объект эгалари сони ва уларнинг исми-шарифи.4. Тақиқ мавжуд ёки мавжуд эмаслиги тўғрисидаги маълумотлар (гаров, хатлаш ва ҳоказо.).
Кўчмас мулк объектлари бўйича маълумотнома олди-сотди, айирбошлаш, ҳадя, васиятнома ва бошқа шартномаларни расмийлаштириш учун тақдим этилади.
Изоҳ (0)