1974 йилда Наманган туманининг «Тепа-Қиёт» маҳалласида туғилган Камолиддин Тошпўлатов Ватаннинг мард ва жасур ўғлонларидан бири эди. Бу ҳақда «Дарё»га Наманган вилоят ҳокимлиги ахборот хизмати маълум қилди.
Болалигидан ҳарбий бўлишни ният қилиб, ушбу касбни ўзининг ҳаёт тарзига айлантирган Камолиддин 2000 йилда Сурхондарё вилоятининг Сариосиё туманида террорчи гуруҳлар билан бўлган жангда ҳалок бўлди. Бугун унинг номи чуқур ҳурмат билан тилга олинади. Икки ўғли эса ота изидан бориб, ҳарбий бўлишни ният қилган.
Ўзбекистон Республикаси Қуролли Кучлари ташкил этилганлигининг 27 йиллиги ҳамда Ватан ҳимоячилари куни муносабати билан Президент фармонига мувофиқ Камолиддин Тошпўлатов «Жасорат» медали билан тақдирланди. Мукофотни топшириш учун унинг хонадонига вилоят ҳокими Хайрулло Бозаров, ҳуқуқни муофаза қилувчи идоралар раҳбарлари келди.
Вилоят раҳбари Камолиддин Тошпўлатовнинг оила аъзоларидан ҳол-аҳвол сўраб, байрам билан муборакбод этди. Марҳум ҳарбийнинг турмуш ўртоғига «Жасорат» медали ва совға-саломларни топширди.
Кейинги манзил Камолиддин Тошпўлатов ва байналминалчи жангчи Шермуҳаммад Сиддиқов таълим олган 24-сонли умумтаълим мактаби бўлди. Мактабда уларга атаб ўрнатилган ёдгорликка гуллар қўйилиб, хотираларига эҳтиром кўрсатилди.
Изоҳ (0)