14 январнинг эътиборга молик янгиликлари — «Дарё» дайжестида.
Бухоро вилояти Олот тумани ҳокими Шерали «Шуҳрат» фермер хўжалиги раҳбари Ориф Дурматовни дўппослаб, унинг ҳисоб рақамидаги 25 млн сўмни бошқа ҳисоб рақамга йўналтириб юборди.
Тумандаги бир нечта фермер хўжалик раҳбарларининг билдиришича, ҳокимнинг фермерларга нисбатан бундай муомаласи, муносабати биринчи маротаба эмас.
***
14 январь куни Теҳрон шаҳри яқинида Boeing 707 йўловчи ташувчи самолёти ҳалокатга учради.
Лайнер Бишкекдан Теҳрондан 40 километр узоқликда жойлашган Кереж шаҳрининг Пайям аэропортига учаётган эди.
Бортдаги 16 кишидан фақат бир киши тирик қолган. Айни пайтда 15 кишидан 10 нафарининг шахси аниқланган.
***
Ўзбекистонда асосий хорижий валюталар сўмга нисбатан қимматлади.
АҚШ доллари курси салкам 20 сўмга ошиб, 8356 сўмга етди.
Евро курси 83 сўмга қимматлади ва 9582 сўмни ташкил этди.
Россия рубли курсига ҳам 1 сўм 61 тийин қўшилиб, 125 сўм атрофида бўлди.
***
Тошкентда ЙПХ инспекторини калтаклаган ҳайдовчи озодликдан маҳрум этилгани маълум бўлди.
2017 йил 18 январь куни тахминан соат 21:30 да Nexia автомобили ҳайдовчиси Маъруфжон А. Мустақиллик ва Шаҳрисабз кўчалари чорраҳасида ЙПХ инспектори томонидан камар тақмаганлиги учун тўхтатилади. Текширув давомида ҳайдовчида транспорт воситасини бошқариш учун зарур ҳужжатлари йўқлиги маълум бўлади.
Жазодан қутулиб қолиш мақсадида Маъруфжон А. инспекторга қаршилик кўрсатади ва унга тан жароҳатлари етказади.
***
Ўзбекистонга қўшни давлатдан кириб келган юк поездида портловчи қурилма топилди.
Божхона қўмитаси ходимлари Туркманистондан Сурхондарё вилоятига ўтган юк поезди вагонларидан бирида 200 грамм оғирлигидаги тротил шашкаси ва детонаторни аниқлади.
Изоҳ (0)