13 январь, якшанба куни футбол бўйича Осиё Кубоги—2019 мусобақаси 2-турининг «F» гуруҳида турнинг сўнгги учрашуви ниҳоясига етди.
Унда Ўзбекистон терма жамоаси Туркманистон термасини йирик 4:0 ҳисобида енгди.
1-бўлимнинг 17-дақиқасида Элдор Шомуродов—Достонбек Ҳамдамов—Жавоҳир Сиддиқов комбинацияси Жавоҳирнинг голи билан якунланди (0:1).
24-дақиқага келиб, Отабек Шукуров узатган тўпни Элдор Шомуродов туркманлар дарвозасига киритди ва ҳисобни 0:2 кўринишига олиб келди.
Учрашувнинг 40-дақиқасида Жалолиддин Машарипов Туркманистон термаси ҳимоячиси қайтарган тўпни кучли зарб билан дарвозанинг пастки нуқтасига жойлаб қўйди (0:3). Орадан икки дақиқа ўтиб, 3-гол муаллифи Жалолиддин Машарипов Элдор Шомуродовни қулай вазиятга олиб чиқди ва «Ростов» ҳужумчиси эса 2 нафар ҳимоячи ва дарвозабонни ҳам алдаб, жамоасининг 4-голини урди (0:4).
Шу тариқа Ўзбекистон термаси Туркманистон терма жамоаси устидан ғалаба қозониб (4:0), плей-офф йўлланмасини нақд қилди. Учинчи турда Купер шогирдлари Японияга қарши гуруҳ ғолиблигини аниқлаш учун майдонга тушади.
Осиё Кубоги—2019
«F» гуруҳи, 2-тур
13 январь, якшанба
Туркманистон—Ўзбекистон 0:4
Голлар: 0:1 – 17 Жавоҳир Сиддиқов, 0:2 – 24 Элдор Шомуродов, 0:3 – 40 Жалолиддин Машарипов, 0:4 – 42 Элдор Шомуродов.Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)