Бухорода 10 минг долларни 84,4 млн сўмга сотаётган валютафурушлар қўлга олинди

Бош прокурутура ҳузуридаги Иқтисодий жиноятларга қарши курашиш департаменти Ромитан туман бўлими томонидан фуқаро Г.Х.нинг аризаси юзасидан тезкор тадбир ўтказилди. Тезкор тадбирда уч нафар валютафуруш жиноят устида қўлга олинди. Бу ҳақда Департаментнинг Бухоро вилоят бошқармаси катта инспектори Нилуфар Аҳмедова «Дарё»га хабар берди.

«Ромитанлик фуқаролар Д.А., Ш.А ва А.К.лар ўзаро жиноий тил бириктириб, бир АҚШ долларини 8440 сўмдан ҳисоблаб, жами 10 минг долларни Г.Х.га 84 400 000 сўмга сотаётган вақтда ушланди», — дейди Нилуфар Аҳмедова.

10 минг доллар ашёвий далил сифатида олинди. Мазкур ҳолат юзасидан фуқаролар Д.А, Ш.А ва А.К.ларга нисбатан Ўзбекистон ЖКнинг 177-моддаси (Валюта қимматликларини қонунга хилоф равишда олиш ёки ўтказиш) 2-қисми «б» (кўп миқдорда) ва «в» (бир гуруҳ шахслар томонидан олдиндан тил бириктириб содир этилган бўлса) бандлари билан жиноят иши қўзғатилиб, тергов ҳаракатлари олиб борилмоқда. Валютафурушлар энг кам ойлик иш ҳақининг 75 бараваридан 200 бараваригача миқдорда жарима ёки 360 соатдан 480 соатгача мажбурий жамоат ишлари билан жазоланиши мумкин.