Тожикистон-Ўзбекистон чегарасида янги «Боботоғ» назорат пункти иш бошлайди
Икки давлат чегараларида янги назорат пунктлари очилиши тўғрисида Тожикистон президенти Имомали Раҳмоннинг ўтган йилнинг август ойида Тошкентга давлат ташрифи чоғида Ўзбекистон раҳбари Шавкат Мирзиёев билан учрашувларда келишувга эришилган. Бу ҳақда «Asia-Plus» хабар берди.
Тожикистон ҳукумати маълумотларига кўра, чегара пункти халқаро мақомга эга бўлмайди, у икки давлат фуқароларига ва улар орасидаги транспорт қатновига хизмат қилади.
Янги пункт кундузги вақтда фаолият юритади.Тожикистон ва Ўзбекистоннинг чегара идоралари икки давлат чегараларида янги назорат пунктлари очиш масаласини ўрганишда давом этади.
Дастлабки маълумотларга кўра, жорий йилда икки давлат чегарасида учдан 15 тагача янги назорат пунктлари очилиши мумкин.
Янги назорат пунктлари Тожикистон ва Ўзбекистоннинг чегара ҳудудлари аҳолиси ўртасидаги муносабатларнинг янада барқарор ривожланишига хизмат қилади ва икки давлат ўртасидаги бошқа чегара постларида навбат оқимини камайтиради.
2002 йилда имзоланган ҳукуматлараро битимга кўра, Тожикистон ва Ўзбекистон чегараларида 16 та назорат пункти, шу жумладан, тўққизта халқаро мақомга эга бўлган назорат пункти ўрнатилган.Уларнинг аксарияти 2000 йилларнинг ўрталарида икки томонлама муносабатларнинг зўрайиши оқибатида ёпилган ва ўтган йилнинг бошига қадар фақат иккита назорат пункти фаолият юритган.
Ўтган йилнинг март ойида Шавкат Мирзиёевнинг Душанбе шаҳрига давлат ташрифи олдидан 16 та назорат пункти тўлиқ фаолиятини тиклаган.
