Қоҳирада Ўзбекистон—Миср ўртасидаги таълим борасидаги ҳамкорлик муҳокама қилинди

Миср томонининг таклифига кўра, Ўзбекистон ва Мисрдаги диний соҳага оид марказлар ўртасида 2019—2023 йилларга мўлжалланган «Йўл харитаси»да кўзда тутилган келишувларни муҳокама қилиш ҳамда ўзаро мувофиқлаштириб олиш мақсадида Ўзбекистон делегацияси ишчи ташриф билан Қоҳира шаҳрида бўлиб турибди. Бу ҳақда «Дарё»га Ўзбекистон халқаро ислом академияси матбуот котиби Абдуҳамид Мухторов хабар берди.

Делегация вакилларининг илк учрашуви бир минг икки юз йилдан зиёд вақт мобайнида фаолият кўрсатиб келаётган «ал-Азҳар» мажмуаси ректори Муҳаммад ал-Маҳрасовий билан «Йўл харитаси»нинг 2019 йилга мўлжалланган чора-тадбирлари юзасидан ўтказилган суҳбат билан бошланди.

«Ўзбекистон Республикаси Президенти Шавкат Мирзиёев ўтган йили октябрь ойида ал-Азҳар мажмуаси раҳбари шайх Аҳмад Муҳаммад Таййибни қабул қилганидан орадан ҳеч қанча вақт ўтмай ал-Азҳар университети ва Ўзбекистон халқаро ислом академияси, Имом Бухорий номидаги ­халқаро илмий-тадқиқот маркази ва бошқа муассасалар ўртасида таълим ҳамда илмий лойиҳаларни ривожлантириш, диний ходимлар малакасини оширишга қаратилган амалий ишлар бошлаб юборилди», — дейди ал-Азҳар университети ректори Муҳаммад ал-Маҳрасовий.

Миср халқига Ўзбекистонни кенгроқ таништириш, мамлакатда бўлаётган ўзгаришлар ҳақида маълумот бериш мақсадида Ўзбекистоннинг Қоҳирадаги элчихонасида мисрлик сиёсатчилар, экспертлар, олимлар ва журналистлар иштирокида учрашув бўлиб ўтди.

«Ўзбекистон иқтисодий жиҳатдан ҳам ўзига хос тараққиёт йўлига эга. Қисқа муддатда мамлакатнинг иқтисодий салоҳияти юксалиб, одамларнинг турмуш шароитлари яхшиланаёт­гани, ялпи ички маҳсулот кўрсаткичлари ортаётгани Президент Шавкат Мирзиёев­нинг оқилона ички ва ташқи сиёсати маҳсу­лидир», — дейди «ал-Жумҳурия» нашри бош муҳаррири ўринбосари ас-Саид Хани.

Давра суҳбати ва матбуот анжумани кўринишида ўтказилган ушбу тадбирда Ўзбекистон Республикасини 2017—2021 йилларда ривожлантиришнинг бешта устувор йўналишлари бўйича Ҳаракатлар стратегиясининг мазмун-моҳияти, Президент Шавкат Мирзиёев бошчилигида олиб борилаётган ички ва ташқи сиёсат, барча соҳаларда кузатилаётган кенг кўламли янгиланиш ва ўзгаришлар, турли йўналишларда амалга оширилаётган ислоҳотлар ҳақида сўз борди. Бу борада мисрлик публицист, ёзувчи Муҳаммад Салома шундай деди:

— Ўзбекистон икки ярим йил ичида барча соҳада жуда катта ютуқларни қўлга киритди. Мамлакатдаги ислоҳотлар аҳоли турмушининг ҳамма жабҳасини, жумладан, сиёсий, ижтимоий, маданий, суд-ҳуқуқ, таълим ва диний соҳани ­бирдек қамраб олди.

Назаримда, Ўзбекистоннинг энг катта ютуғи очиқ ташқи сиёсат юритиб, халқаро майдонда фаол ҳаракат қилаётганидир. Ўзбекистон Президенти Шавкат Мирзиёевнинг хорижий давлатларга кўплаб расмий ташрифлари, айниқса, БМТ Бош Ассамблеясида илгари сурган глобал аҳамиятга эга таклифлари Ўзбекистоннинг халқаро майдондаги ­обрўйи тобора ошиб бораётганини англатади.

— Мени Ўзбекистонда рўй бераётган ўзгаришлар жуда қизиқтиради.«Ўзбекистон: Ислом тамаддуни манбалари» номли китоб ёздим. ­Мақсад — араб китобхонини Ўзбекистон билан яқиндан таништириш. Китоб икки қисмдан иборат. Биринчи қисм Ўзбекистоннинг ислом маданияти ривожига қўшган буюк тарихий ҳиссасини ­ёритишга бағишланган. Иккинчисида Ўзбекистондан етишиб чиққан турли соҳа олимларининг ҳаёти ва илмий фаолияти ёритиб берилган.

«Президент Шавкат ­Мирзиёев икки ярим йил ичида жуда катта муваффақиятларга эришди. Айниқса, қўшни мамлакатлар билан дўстона алоқаларни ривожлантиришга муваффақ бўлмоқда. Бу минтақада тўпланиб қолган кўплаб муаммоларга ечим топишга олиб келди», — дейди мисрлик олим Аҳмад Тарабик.

Таркибида Ўзбекистон Республикаси Президенти Администрацияси, Ўзбекистон мусулмонлари идораси, Ўзбекистон халқаро ислом академияси вакиллари бўлган делегациянинг ишчи ташрифи давом этмоқда.