Zeromax компаниясининг собиқ ижрочи директори Миродил Жалолов жорий йил 8 январь куни ДХХ тергов изояторидан озод қилинди ва шу куннинг ўзида Тошкентдаги уйига қайтди. Бу ҳақда унинг турмуш ўртоғи Фотима Жалолова маълум қилди, дея хабар беради «Anhor.uz».
Жиноий ишлар бўйича Тошкент вилоят суди 53 яшар Миродил Жалоловга нисбатан ҳибсга олиш тариқасидаги эҳтиёт чорасини бекор қилди ва у суд залидан қўйиб юборилди. Шундай бўлса ҳам, Жалолов Ўзбекистон Жиноят кодексининг бир неча моддалари билан айбдор деб топилди ва 17 687 040 сўм жаримага тортилди.
2017 йил 4 январида ҳам Миродил Жалолов суд залидан озод қилинган, ўшанда суд қарорида унга «етказилган зарарни қоплаш учун вақт берилгани» қайд этилганди. Бироқ 2017 йил мартида у яна қамоққа олинган ва шу пайтгача ДХХ тергов изояторида сақланаётганди. Жалоловга яқин бўлган манба буни «давлатга етказилган ўнлаб миллион доллар зарар қопланмагани» билан изоҳлаганди.
Маълумот учун, 2010 йил май ойида Ўзбекистонда Zeromax компанияси фаолияти тўхатилган, мол-мулки давлат фойдасига мусодара қилинган, ҳисоб рақамлари эса музлатилганди. Мамлакатда «Одилбой» номи билан машҳур бўлган Миродил Жалолов эса ўша йил сентябрь ойида қамоққа олинганди.
Изоҳ (0)