Тошкент шаҳар давлат солиқ бошқармаси томонидан шаҳар прокуратураси ҳамда бошқа мутасадди ташкилотлар билан ҳамкорликда жойларда аҳоли ва тадбиркорлар ўртасида айрим маҳсулотлар 20 фоизли қўшимча қиймат билан сотилаётгани бўйича тушунтириш ишлари олиб борилмоқда. Бу ҳақда Тошкент шаҳар давлат солиқ бошқармаси Жамоатчилик билан алоқалар ва ҳуқуқий ахборот шўъбаси «Дарё»га хабар берди.
Жумладан, Тошкент шаҳар давлат солиқ бошқармаси раҳбари Н.Турсунов, Тошкент шаҳар прокурори ўринбосари А.Пўлатов пойтахтнинг Мирзо Улуғбек туманида фаолият юритаётган «Крантас» масъулияти чекланган жамиятига қарашли ишлаб чиқариш корхонаси келган ҳолда корхона раҳбари ҳамда ҳисобчиси билан ўзаро фикр алмашиб, қўшилган қиймат солиғини ҳисоблаш ва тўлаш тартиби ҳақида батафсил маълумот берди.
Юзма-юз мулоқот жараёнида қайд этилганидек, бугун Ўзбекистонда солиқ маъмуриятчилигида янги тизим яратилди. Яъни, солиқ хизмати органлари текширувчи эмас, хизмат кўрсатишга йўналтирилган идорага айланмоқда.
Эслатиб ўтамиз, солиқ қонунчилигига киритилган ўзгартиришларга мувофиқ, жорий йилдан жисмоний шахслардан олинадиган даромад солиғининг 12 фоизлик ягона ставкаси жорий этилди. Бу бюджетдан ташқари пенсия жамғармасига ушлаб қолинадиган 8 фоизли суғурта бадали бутунлай бекор қилинди.
Натижада 2019 йилда Тошкент шаҳар фуқаролари ихтиёрида 1342,5 миллиард сўм маблағ қолиши кутилмоқда.Шунингдек, ягона ижтимоий тўлов ставкаси 15 фоиздан 12 фоизгача пасайтирилди. Давлат мақсадли жамғармаларига юридик шахсларнинг айланма маблағлари (тушуми)дан ундириладиган 3,2 фоизли мажбурий ажратмалар бекор қилинди. Ушбу пасайтиришлар ҳисобига жорий йилда Тошкентда фаолият юритаётган тадбиркорлар ихтиёрида 702,2 миллиард сўм қўшимча маблағ қолиши кутилаяпти.
Учрашувларда солиқ қонунчилигига киритилган ўзгартиришларни солиқ тўловчиларга тушунтириш ҳамда қўшимча қулайликлар яратиш мақсадида ҳар бир туман давлат солиқ инспекциясининг Telegram канали ишга туширилгани маълум қилинди.
Шунингдек, тадбиркорлик субъектлари солиқ қонунчилиги бўйича қўшимча саволлар юзасидан Тошкент шаҳар давлат солиқ бошқармасининг 71-244-54-86 рақамига қўнғироқ қилишлари мумкинлиги қайд этилди.
Изоҳ (0)