Эктор Купер: Осиё Кубогида ҳар қандай жамоа сюрприз тақдим этиши мумкин

9 январь, чоршанба куни БАА мезбонлик қилаётган Осиё Кубоги—2019 мусобақаси доирасида Эктор Купер бошчилигидаги Ўзбекистон миллий терма жамоаси Уммон термасига қарши 1-тур учрашувида майдонга тушади. Аргентиналик мутахассис ва терма жамоа сардори Одил Аҳмедов ўйиндан олдинги матбуот анжуманида иштирок этди, деб ёзади «Championat.asia».

Биз фақат Уммон билан ўйинга эмас, бутун мусобақага тайёрландик. Тўғри, биринчи рақибимиз Уммон бўлади. Мусобақага юқори кайфиятда тайёрландик ва ишладик. Барчамиз эртанги ўйинга тайёрмиз. Насиб қилса ҳаммаси яхши бўлади.

— Уммон Форс кўрфази кубоги қўлга киритган. Рақиб ҳақида фикрингиз?

— Уммон яхши терма жамоа. Лекин уларни майдонда кўришимиз керак. Форс кўрфази кубоги кучли мусобақа. Осиё Кубогида ҳар қандай жамоа сюрприз тақдим этиши мумкин.

— Ноябрь ойида Австралияда Жанубий Корея билан ўртоқлик учрашувидан сўнг деярли 50 кун вақт ўтди. Аммо Ўзбекистон терма жамоаси ўртоқлик учрашуви ўтказмади. Бундай катта мусобақадан олдин бу сизни қанчалик хавотирга солмоқда?

— Бу менинг қарорим. Лекин хавотирга тушганим йўқ. Терма жамоаларга қарши ўйнасак ҳам бўларди, аммо футболчиларнинг жароҳат олишлари хавфи борлиги учун шундай қарорга келдик. Осиё Кубогида қатнашадиган терма жамоа бўлганида, албатта, ўртоқлик ўйинида майдонга тушардик, бироқ бундай жамоа топилмади.

— Ўзбекистон терма жамоасига келганингизда жамоанинг янги ўйин қиёфасини шакллантириш учун бир ой вақт керак бўлади деган мазмунда фикр билдирган эдингиз. Ўртоқлик ўйинларидаги натижалар ўз йўлига. Ўтган вақт мобайнида жамоани Осиё Кубогига ўзингиз истаган қиёфага киргиза олдингизми?

— Биз биргаликда етарлича ишладик. Нималарнидир ўзгартиришга ҳаракат қилдик. Аммо ҳеч қайси мураббий қайсидир футболчи эртага майдонга тушиб ўйнаб кетишига кафолат бермайди. Келинглар яхши ният қилиб турайлик. Эртага насиб қилса мухлисларга ёқадиган ўйин кўрсатамиз.

Эктор Купер, Ўзбекистон терма жамоаси бош мураббийи

Барчани Осиё Кубоги бошланиши билан табриклайман. Уммон билан чиройли ўйин бўлади деб ўйлайман. Эртага биз учун ижобий кун бўлишини хоҳлардик.

—Уммон терма жамоаси сардори ва дарвозабони Али Ал Ҳабси Осиё Кубогида қатнашмайди. Бу борада нима дея оласиз?

— Бу дарвозабонни яхши танийман. У кучли посбон. Уммон терма жамоаси учун жуда катта йўқотиш деб айта оламан. Агар унинг йўқлиги бизга ёрдам берса, хурсанд бўламан.

Одил Аҳмедов, Ўзбекистон терма жамоаси сардори