Жисмоний ва юридик шахсларнинг мулкини ишончли қўриқлаш, ўта муҳим, тоифаланган ва бошқа объектларни ҳимоялаш бўйича замонавий тизим яратилмоқда, деб ёзади ЎзА.
Ўзбекистон Республикаси Президентининг 2018 йил 12 декабрдаги «Жисмоний ва юридик шахслар мулкининг қўриқланишини таъминлаш самарадорлигини ошириш чора-тадбирлари тўғрисида»ги қарори бунга замин яратди.
Айтиб ўтиш керакки, қўриқлаш фаолиятини ташкил этишда ҳозирга қадар бир қатор муаммолар мавжуд эди. Замонавий ахборот-коммуникация технологияларини жорий этиш даражасининг пастлиги, мавжуд қўриқлаш тизими ва технологияларининг етарлича самарали эмаслиги иш сифатига салбий таъсир кўрсатиб келган.
Эндиликда шу каби муаммоларни бартараф этиш учун қатор чора-тадбирлар амалга оширилади. Жумладан, «Хавфсиз хонадон» концепцияси амалиётга жорий этилмоқда. Унга кўра, бутун республикада техник қўриқлаш ва ҳаракатланиш пунктларига хабарни узатиш ва марказлашган кузатувнинг автоматлаштирилган тизими яратилади.
Бунинг натижасида қўриқланадиган объектлардан келиб тушган хабар жойига нафақат қўриқлаш хизмати ходимлари, балки энг яқин патруль гуруҳининг тез етиб боришини таъминлаш механизмлари ишлаб чиқилади. Бундан буён кўчмас мулклар билан бирга, транспорт воситалари ва бошқа ҳаракатланувчи объектларни қўриқловга олишга эътибор кучайтирилади.
Янги турар жойлар қурилишида уларни мажбурий тарзда қўриқлаш-ёнғин ташвишгоҳлари ва газоанализаторлар билан жиҳозланади.
Юқоридаги чора-тадбирлар амалга оширилганлиги даражасидан келиб чиқиб, маҳаллаларни хавфсизлик даражасининг чораклик рейтинги асосида баҳолаш тизими ҳам жорий этилади ва ҳар йили «Энг хавфсиз маҳалла» республика танлови ўтказилади.
Бундан ташқари, фуқароларга енгиллик яратиш, ўрнатиладиган қўриқлаш техникаларининг сифатини ошириш мақсадида, қўриқланадиган объектларда ўрнатиладиган қўриқлов техник воситалар ва тизимларини монтаж, демонтаж қилиш, таъмирлаш, уларга техник хизмат кўрсатиш ва эксплуатация қилиш бўйича ишларни бажарувчи «Қўриқлаш Сервис» давлат унитар корхонаси ташкил этилди.
2019 йил 1 январдан бошлаб, жисмоний шахсларнинг уй-жойлари ва хонадонларига қўриқлаш хизматини кўрсатиш мобайнида фойдаланишга бериладиган қўриқлов техник воситалари жиҳозларини ўрнатиш, қўриқлаш хизмати маблағлари ҳисобидан бепул амалга оширилади.
Бу эса, фуқароларнинг қўриқлаш хизматига ишончини ва ўз мулкларини қўриқлаш хизмати орқали ҳимоя қилишини кенгайтиради. Натижада фуқароларнинг мол-мулкига нисбатан бўладиган жиноий тажовузларнинг камайишига эришилади.
Изоҳ (0)