Ўзбекистон ёшлар иттифоқи, «Ёшлар медиа маркази» ННТ ҳамда «Менинг юртим» телеканали ҳамкорлигида ёш бошловчилар, мухбирлар ҳамда операторларни қўллаб-қувватлаш мақсадида Тошкент шаҳрининг Миробод туманидаги Ёшлар марказида «Ёш журналистлар мактаби» ташкил этилди. Бу ҳақда «Дарё»га Ёшлар медиа маркази маълум қилди.
Мактабнинг очилиш маросимида Ўзбекистон ёшлар итттифоқи Марказий Кенгаши раиси Қаҳрамон Қуранбоев, Ўзбекистон электрон оммавий ахборот воситалари миллий ассосацияси бошқаруви раиси Фирдавс Абдухаликов, «Менинг юртим» телеканали директори Қобилжон Аҳмедов ва журналистикага ҳавасманд ёшлар иштирок этди.
Мазкур мактаб ижодкорлари томонидан ёшлар ҳаёти оммавий ахборот воситаларида кенг ёритилиб, Ўзбекистон ёшлар иттифоқи Марказий Кенгаши тизими учун малакали журналистлар захираси яратилади.
«Ёш журналистлар мактаби» ўқувчилари телерадио, матбуот ва интернет журналистикаси бўйича билим олади. Мактабда устоз-шогирд анъаналари йўлга қўйилиб, унда ташкил этиладиган маҳорат дарсларини таниқли ижодкорлар, профессионал операторлар ҳамда монтаж режиссёрлари олиб боради. Машғулотлар бепул олиб борилади.
Замонавий талаблар асосида ташкил қилинган мактабда тасвирга олиш майдони, овоз ёзиш студиялари мавжуд бўлиб, «Юлдузча», «Мен юлдузман», «Мажнунтол», «Сардорлар», «Кофе брейк» каби кўрсатувлар тайёрланади.
Изоҳ (0)