Universal Mobile Systems (UMS) мобил оператори 2019 йилда Mobiuz савдо белгиси остида фаолият кўрсатади. Компания баёнотига кўра, у ўз савдо белгиси ва бренд қадриятларини янги замон талабларига мослаштириб янгиламоқда. Ребрендинг компания фаолиятида кечаётган катта ўзгаришлар билан узвий боғлиқ.
UMS сўнгги вақтларда янги ривожланиш ва рағбатлантирувчи омилларга эга бўлди. Хусусан, Президентнинг 13 декабридаги фармонига мувофиқ, компания жорий фаолияти билан бир қаторда давлат хизматлари операторига айланди. Унга ҳукумат мобил алоқаси ва «криптографик ҳимояланган илк миллий UzChat мессенжери»ни татбиқ этиш вазифаси юклатилган. Бундан ташқари, UMS платформасида Лойиҳа бошқаруви ягона миллий ахборот тизими, давлат сектори учун блокчейн ечимлар, аҳоли учун рақамлаштирилган давлат хизматлари яратилмоқда.
Ундан аввалроқ, Президентнинг 21 ноябрдаги «Рақамли иқтисодиётни ривожлантириш мақсадида рақамли инфратузилмани янада модернизация қилиш чора-тадбирлари тўғрисида»ги қарорига мувофиқ, UMS’нинг олдига Ўзбекистон ҳудудини босқичма-босқич ривожланган мамлакатлар даражасида Интернет тармоғига уланиш имкониятлари билан имкон қадар тўлиқ қоплаш, барча давлат хизматларини фақатгина ўз маълумотларга ишлов бериш марказлари орқали кўрсатиш бўйича вазифалар қўйилган эди.
«Бундай шароитларда компания ребрендинги янги ўзгаришларга жавоб бериши, қадриятларни ифода этиши, маъноли ва ғоявий мазмунга эга бўлиши ва шу билан бирга идрок этиш учун содда бўлиши лозим», — дейилади компания баёнотида. Шундан келиб чиқиб, UMS мобил операторининг савдо белгисини Mobiuz деб ўзгартиришга қарор қилинган. Ребрендинг ишлари декабрда — ном танлаш, хос рангларни ва бренднинг бошқа белгиларни ишлаб чиқишдан бошланган.
UMS’нинг баёнотига кўра, 2019 йил оператор учун «компания абонентлари ва мижозларига, шубҳасиз, фақат ижобий жиҳатдан таъсир қиладиган амалий ўзгаришлар даврига айланади». «Давлат хизматлари оператори сифатида, UMS компанияси аҳолининг рақамли хизматлар, юқори тезликдаги Интернет ва хамёнбоп сервисларга бўлган талабини имкон қадар тўла қондириш йўлида зарур барча ишларни қилади», — дейилади компания баёнотида.
Изоҳ (0)