Ўзбекистон Қуролли Кучлари академиясида олий ҳарбий таълим муассасалари курсантлари ўртасида 2018 йилда ўтказилган фан олимпиадасида ғолибликни қўлга киритган курсантларни тақдирлаш маросими ўтказилди. Бу ҳақда Мудофаа вазирлиги матбуот хизмати «Дарё»га маълум қилди.
Маросимда Ўзбекистон мудофаа вазирининг тарбиявий ва мафкуравий ишлар бўйича ўринбосари полковник Азизбек Икрамов иштирок этиб, ўтган икки йил мобайнида Қуролли Кучлар тизимида ҳарбий кадрларнинг интеллектуал салоҳиятини ошириш бўйича амалга оширилган ишлар, олий ҳарбий таълим муассасаларида курсантларнинг соҳа бўйича мукаммал билим олишлари учун яратилган шарт-шароит ва имкониятлар хусусида тўхталиб ўтди.
Эслатиб ўтамиз, 5—29 ноябрь кунлари Мудофаа вазирлиги олий ҳарбий таълим муассасаларининг курсантлари ўртасида ҳарбий-касбий тайёргарлик, инглиз тили, информатика ва математика фанларидан олимпиада (иккинчи Республика босқичи) ўтказилган эди. Унда ғолибликни қўлга киритганлар 2019 йилнинг март—май ойларида Мустақил давлатлар ҳамдўстлигига аъзо давлатларнинг олий ҳарбий таълим муассасалари ўртасида фанлар бўйича ўтказиладиган курсантлар олимпиадасида қатнашади.
Фан олимпиадаларининг якуний натижаларига кўра, ҳарбий-касбий тайёргарлик бўйича умумжамоа ҳисобида биринчи ўрин Қуролли Кучлар академиясига насиб этган бўлса, иккинчи ўринни Чирчиқ олий танк қўмондонлик-муҳандаслик билим юрти жамоаси банд этди. Ўзбекистон Республикаси олий ҳарбий авиация билим юрти курсантларидан иборат жамоа эса учинчи поғонани эгаллади.
Инглиз тили фани бўйича умумжамовий ҳисобда:
- 1-ўрин — Тошкент ахборот технологиялари университети Maxсус факультети;
- 2-ўрин — Қуролли Кучлар академияси;
- 3-ўрин — Олий ҳарбий авиация билим юрти.
Математика фани бўйича эса кўрсатилган натижалар қуйидагича:
- 1-ўрин — Қуролли Кучлар академияси;
- 2-ўрин — Чирчиқ олий танк қўмондонлик-муҳандаслик билим юрти;
- 3-ўрин — Тошкент ахборот технологиялари университети Maxсус факультети.
Шунингдек, Академияда «Ватанпарварлик ойлиги» доирасида III Параосиё ўйинларининг чампион ва совриндорлари билан учрашув ўтказилди.
Спортчилар тадбир давомида сўзга чиқиб, ўзлари ҳақида ва шуғулланаётган спорт тури тўғрисида, шу билан бирга, қизиқишлари ҳамда келажакда забт этмоқчи бўлган марралари билан ўртоқлашди. Учрашув якунида спортчилар ва йиғилганлар ўртасида ўтказилган қизиқарли савол-жавоблар даврага янада файз бағишлади.
Изоҳ (0)