Ўзбекистон Президенти ўз Мурожаатномасида парламентнинг муҳим қарорлар қабул қилиш ва қонунлар ижросини назорат этиш фаолиятини жонлантириш лозимлигини таъкидлади.
«Ҳозирги кунда Конституцияга мувофиқ парламент Бош вазирни тасдиқлайди. Лекин вазирларни лавозимга қўйишда қатнашмайди. Шунинг учун Ҳукумат аъзолари парламент олдида масъулиятни етарли даражада ҳис этаётгани йўқ. Шу боис Вазирлар Маҳкамаси аъзоларини Олий Мажлис томонидан тасдиқлаш амалиётини киритишни таклиф этаман.
Бўлажак вазир парламент аъзолари олдида соҳани ривожлантириш бўйича ўз дастурини ҳимоя қилсин ва унга эришиш йўлларини асослаб берсин. Бир сўз билан айтганда, лавозимга муносиб эканини исботласин», — деди Президент.
Шунингдек, вилоят ҳокимини олдин кенгаш аъзолари тасдиқлайди, кейин президент тасдиқлайди.
«Айни пайтда маҳаллий кенгашлар вилоят ва туман идоралари раҳбарларини ҳам тасдиқлаш ҳам худди шундай бўлади. Туман раҳбарлари ҳам, шаҳар раҳбарлари ҳам, вилоят раҳбарлари ҳам кенгаш депутатлари томонидан тасдиқланиши керак», —дея қўшимча қилди Шавкат Мирзиёев.
Шунингдек, Ўзбекистон Президенти ўз нутқида Ҳукумат фақат кундалик масалаларни ҳал қиладиган тузилмага айланиб бораётганини таассуф билан қайд этди:
«Ҳозирги кунда Ҳукумат таркибига 160 дан ортиқ идора ва ташкилотлар киради, Бош вазирнинг соҳа ва тармоқлар бўйича 8 нафар ўринбосари мавжуд. Лекин Вазирлар Маҳкамаси ва унинг таркибидаги идоралар бугунги ислоҳотлар жараёнида тўлақонли кучга айландими? Бу саволга, афсуски, ижобий жавоб беролмаймиз.
Вазирлар арзимаган масала бўйича ҳам Бош вазир олдига қатнайди. Оқибатда Ҳукумат фақат кундалик масалаларни ҳал қиладиган тузилмага айланиб бормоқда».
Изоҳ (0)