Ўзбекистон Қуролли Кучларида амалга оширилаётган ислоҳотлар натижаси билан танишиш мақсадида Мудофаа вазирлиги Фахрийлар ишлари бўйича марказий кенгаши томонидан бир гуруҳ нафақадаги ҳарбий хизматчилар Самарқанд шаҳри ва Марказий ҳарбий округига қарашли ҳарбий қисмларга экскурсия уюштирди. Бу ҳақда вазирлик матбуот хизмати «Дарё»га маълум қилди.
Соҳибқирон Амир Темур давлатининг пойтахти бўлмиш Самарқанд шаҳрига етиб келган фахрийлар биринчи навбатда Ўзбекистон Республикаси Биринчи Президенти Ислом Каримовнинг мақбарасини зиёрат қилди.
Шундай сўнг фахрийлар Марказий ҳарбий округи қўшинлари қўмондонлигида бўлди. Бу ерда округ қўмондонининг ўринбосари ҳамда Фахрийлар ишлари бўйича кенгаши аъзолари билан биргаликда Ўзбекистон Қуролли Кучларининг 27 йиллигини муносиб кутиб олиш масалалари муҳокама қилинди.
Меҳмонлар ҳарбий округдаги ҳарбий қисмларда ҳарбий хизматчиларга яратилган шароитлар билан танишди. Авваллари бу ерда хизмат қилган, ҳозирда фахрийлик гаштини сураётган нафақадаги ҳарбий хизматчилар яратилган шароитлардан жуда мамнун бўлди.
«Ростдан ҳам улкан ишлар амалга оширилибди. Ҳарбий хизматчиларга барча қулайликлар яратилган. Ҳарбий қисмлар ва ҳарбий шаҳарчаларнинг янада яхшиланганини ўз кўзим билан кўрдим», — дейди нафақадаги полковник, моҳир ҳарбий учувчи Александр Харламов.
Изоҳ (0)