ЎзА мухбири кўз шифокори Элдор Юсупов билан суҳбатлашди. Шифокор ушбу суҳбат давомида болаларнинг туғма кўз нуқсони билан дунёга келаётгани сабабларини изоҳлади.
«Бугун икки ёшли болани тиббий кўрикка олиб келишди. Унинг кўриш қобилияти минус учни кўрсатди. Кейинги вақтда бундай беморлар сони кўпайиб қолди. Авваллари бундай касаллик наслий ҳисобланарди. Шунинг учун, боланинг ота-онасини текширувдан ўтказдик. Улар соғлом, лекин боланинг кўзида нуқсон бор. Суриштирсак, она ҳомиладорлигида нотўғри овқатланган.
У кўп миқдорда газли ичимликлар ичган. Турли хилдаги фаст-фудлар истеъмол қилган. Мобил телефондан узлуксиз фойдаланган. Кечалари билан интернетдан фойдаланганини ўзи тан олди. Шу тариқа ўзи витамин етишмай, нозиклашиб турган организмда электрон нурланиш юзага келгани ҳисобига болада туғма нуқсон пайдо бўлган.
Бундай беморлар сони кўпаймоқда. Ҳозир қайноналар меҳрибон, ғамхўр. Келин ҳомиладор бўлса, уни авайлаб-асрашга ҳаракат қилади. Бориб, дам ола қолинг, дейди. Келин эса бекорчиликдан телефон ёки компьютердан фойдаланиб ўтиради, нурланаётгани парвойига ҳам келмай. Кейин эса, нуқсонли бола дунёга келади. Менинг фикримча, меҳрибон қайноналар ва дангаса келинлар туфайли туғма бемор набиралар кўпаяди.
Нима қилмоқ керак? Энг аввало, ҳомиладор аёл витаминларга, фойдали элементларга бой таомларни истеъмол қилиши, тоза ҳавода юриб, кўпроқ ҳаракат қилиши керак. Инсон қанча кўп ҳаракат қилса, танада қон шунча яхши айланади. Қон яхши айланса, бола соғлом бўлади. Турди электрон воситалардан узоқроқ бўлиб, ўзини нурланишдан асраса, боланинг кўришида нуқсон бўлмайди», – дейди Элдор Юсупов.
Изоҳ (0)