O‘zbekiston Qurolli Kuchlarida amalga oshirilayotgan islohotlar natijasi bilan tanishish maqsadida Mudofaa vazirligi Faxriylar ishlari bo‘yicha markaziy kengashi tomonidan bir guruh nafaqadagi harbiy xizmatchilar Samarqand shahri va Markaziy harbiy okrugiga qarashli harbiy qismlarga ekskursiya uyushtirdi. Bu haqda vazirlik matbuot xizmati “Daryo”ga ma’lum qildi.
Sohibqiron Amir Temur davlatining poytaxti bo‘lmish Samarqand shahriga yetib kelgan faxriylar birinchi navbatda O‘zbekiston Respublikasi Birinchi Prezidenti Islom Karimovning maqbarasini ziyorat qildi.
Shunday so‘ng faxriylar Markaziy harbiy okrugi qo‘shinlari qo‘mondonligida bo‘ldi. Bu yerda okrug qo‘mondonining o‘rinbosari hamda Faxriylar ishlari bo‘yicha kengashi a’zolari bilan birgalikda O‘zbekiston Qurolli Kuchlarining 27 yilligini munosib kutib olish masalalari muhokama qilindi.
Mehmonlar harbiy okrugdagi harbiy qismlarda harbiy xizmatchilarga yaratilgan sharoitlar bilan tanishdi. Avvallari bu yerda xizmat qilgan, hozirda faxriylik gashtini surayotgan nafaqadagi harbiy xizmatchilar yaratilgan sharoitlardan juda mamnun bo‘ldi.
“Rostdan ham ulkan ishlar amalga oshirilibdi. Harbiy xizmatchilarga barcha qulayliklar yaratilgan. Harbiy qismlar va harbiy shaharchalarning yanada yaxshilanganini o‘z ko‘zim bilan ko‘rdim”, — deydi nafaqadagi polkovnik, mohir harbiy uchuvchi Aleksandr Xarlamov.
Izoh (0)