Ўзбекистон ёшлар иттифоқи ҳузурида «Ёшлар – келажагимиз» жамғармасининг ташкил этилгани ҳудудлардаги тадбиркор ёшларга қатор қулайликлар яратмоқда, дейилади ЎзА хабарида.
Қарши туманида истиқомат қилувчи Бунёджон Мустафоев ана шу қулайликдан самарали фойдаланаётган ёшлардан бири. У тегишли тартибда ўз лойиҳаларини тақдим қилгач, 500 миллион кредит маблағи ажратилди.
Бошида оила аъзоларига ёрдамлашиб, тадбиркорлик сир-асрорларини пухта ўзлаштирган Бунёджон ўзининг тадбиркорлик фаолиятини йўлга қўйишда қийналмади. Бозор талабидан келиб чиқиб, ҳар хил турдаги ширинликлар ишлаб чиқаришни бошлади.
– Анчадан буён катта маблағга эҳтиёж сезаётган эдик, сабаби ширинлик пиширадиган ускунанинг баҳоси анчайин баланд эди, – дейди якка тартибдаги тадбиркор Б.Мустафоев. – Олинган маблағ эвазига Эрон давлатида ишлаб чиқарилган пишириқ пиширадиган ускуналар тўпламини келтирдик. Замон талабларига тўла мос келадиган ушбу ускуна маҳсулотни ҳар томонлама сифатли пиширади. Яъни мижозлар дидига мос келадиган тарзда. Бундан ташқари, ускуна энергия тежамкор. Ҳозирда оилавий корхонамиз жойлашган жойда қўшимча хоналар олиб шу ерда иш юритяпман. Янги цехимиз учун туманимиз марказидан фойдаланилмай турган бинони сотиб олдик. Ҳозир қурилиш-таъмирлаш ишлари кетмоқда. Бино қурилиши битгач тўлиқ унга кўчамиз. Ҳозирда 3 нафар ишчимиз бор. Янги бинога кўчгач фаолиятимизни янада кенгайтиришни мақсад қилганмиз.
Изоҳ (0)