Инновацион ривожланиш вазирлигида Ўзбекистон ва Ҳиндистон ўртасидаги савдо-иқтисодий муносабатларни янада кенгайтириш ишлари доирасида Ҳиндистоннинг Arvind Limited текстил компанияси раҳбарлари билан учрашув бўлиб ўтди. Бу ҳақда «Халқ сўзи Online» хабар берди.
«Arvind Limited текстил маҳсулотларини ишлаб чиқарувчи ва экспорт қилувчи корхоналар ичида Ҳиндистондаги энг йирик ва дунёдаги тўртинчи компания ҳисобланади. Йиллик пул айланмаси 2 миллиард АҚШ долларига тенг. Текстил маҳсулотлари ишлаб чиқариш билан бир қаторда компания қишлоқ хўжалиги соҳасида ҳам фаолият юритиб, телекоммуникация, инжиниринг ва кўчмас мулк билан боғлиқ хизматлар кўрсатади», — дейди Arvind Limited компаниясининг пахтачилик ва агробизнес бўйича директори Прагнеш Шах.
Учрашувда мамлакатда амалга оширилаётган янги иқтисодий-инвестицион сиёсат, хорижий инвесторларга яратилаётган шароитлар, шунингдек, текстил соҳасида кластер лойиҳаларини амалга ошириш имкониятлари ҳақида батафсил маълумотлар берилди.
Жумладан, пахта етиштириш ва қайта ишлаш ҳамда текстил маҳсулотлари ишлаб чиқарувчи агротекстил кластерини яратиш масалалари муҳокама этилди. Шу билан бирга меҳмонларда ўзбек олимлари томонидан яратилган пахта ген-нокаути технологияси катта қизиқиш уйғотиб, мазкур технологияни тижоратлаштириш имкониятларини кўриб чиқишлари мумкинлигини маълум қилди.
Изоҳ (0)