Фарғонада Мудофаа вазирлиги, вилоят ҳокимлиги, Миллий гвардия вилоят бўлинмаси, ёшлар иттифоқи вилоят кенгаши, мудофаага кўмаклашувчи «Ватанпарвар» ташкилоти ҳамкорлигида «Ватан – муқаддас, уни ҳимоя қилиш шарафли бурчдир!» шиори остида ҳарбий-ватанпарварлик фестивали ўтказилди. Бу ҳақида «Дарё» мухбири Азизжон Эрматов хабар берди.
Фестивальда Фарғона шаҳридаги олий ва умумтаълим муассасалари ўқитувчилари, талабалар, ўқувчилар, ҳарбий хизматчилар ва уларнинг оила аъзолари, кенг жамоатчилик вакилларидан иборат 15 мингдан ортиқ иштирокчи қатнашди.
Дастлаб ўқувчилар, талабалар ҳамда Мудофаа вазирлиги ҳарбий хизматчилари ва ҳуқуқни муҳофаза қилиш органлари ходимлари иштирокида марафон ўтказилди.
Шаҳар кўчалари бўйлаб замонавий ҳарбий техникаларнинг тантанали паради уюштирилди.
Шарқий ҳарбий округ қўшинлари қўмондонлиги, Миллий гвардиянинг ҳудудий бўлими, вилоят ички ишлар, Фавқулодда вазиятлар бошқармаси томонидан кўргазма ташкил қилинди. Унда ёшлар ҳарбий техника, қурол-аслаха ва бошқа махсус воситалар билан яқиндан танишди. Ҳарбий хизматчилар замонавий ҳарбий техникаларнинг тактик-техник хусусиятлари ҳақида батафсил маълумот берди.
«Истиқлол» стадионида ҳарбийлар томонидан ҳарбий-жанговар чиқишлар намойиш қилинди. Шарқий ҳарбий округ ҳарбий оркестри томонидан ҳарбий-ватанпарварлик мавзусида концерт дастури ўтказилди.
Ўзбекистон Президентининг фармойишига мувофиқ Қуролли Кучлар ташкил этилганининг 27 йиллиги ҳамда Ватан ҳимоячилари куни муносабати билан жорий йилнинг 15 декабридан 2019 йилнинг 15 январига қадар бир ой муддат «Ватанпарварлик ойлиги» этиб белгиланган. Ойлик доирасидаги бу каби тадбирлар Мудофаа вазирлигининг барча қўшинларида ҳар куни ўтказилмоқда.
Изоҳ (0)