Бандлик ва меҳнат муносабатлари вазирлиги юқори синф ўқувчиларини касбга йўналтириш бўйича лойиҳани синов тариқасида ишга туширди. Бу ҳақда вазирлик матбуот хизмати хабар берди.
Лойиҳа доирасида республиканинг тўрт ҳудуди — Тошкент шаҳри, Янгийўл, Жиззах ва Гулистон шаҳарларидан 5 та мактаб танлаб олинди. Унда 929 нафар 9, 10 ва 11-синф ўқувчиси иштирок этмоқда.
Касбга йўналтириш дастури HP ускунасида ўтказиладиган компьютерли тест синови ва амалий семинардан иборат. Дастур якуни бўйича ҳар бир ўқувчига тест натижалари ҳамда ишга кириш бўйича тавсиялар берилади.
Мазкур лойиҳа ҳамкори сифатида MyWay ривожлантириш ва касбга йўналтириш маркази қатнашмоқда. Тест синовидан Ўзбекистондаги барча ўқувчилар бирдек фойдалана олиши учун компания мазкур дастурни ўзбек тилига ўгириш ва мослаштириш ишларига киришган.
Лойиҳани амалга ошириш натижаларига кўра вазирлик томонидан мактаб ва коллеж ўқувчилари орасида касбга йўналтиришни жорий этиш бўйича таҳлилий материал ва тавсиялар ишлаб чиқилади.
Изоҳ (0)