Жорий йилнинг 15 декабрь ҳолатига 679,14 миллиард сўмлик 28 та инвестиция лойиҳаси фойдаланишга топширилиб, уларнинг 7 таси ЭИЗларда фаолият кўрсатмоқда. 2018 йил якунига қадар қўшимча 134,47 миллиард сўмлик 9 лойиҳа ишга туширилиши кўзда тутилган. Бу ҳақда ЎзА хабарида айтилади.
Мамлакатда фармацевтика соҳасида иқтисодий ислоҳотларни янада чуқурлаштириш, янги ишлаб чиқариш қувватларини ишга тушириш ва мавжудларини модернизация қилиш, чет эл инвестицияларини жалб қилиш учун қулай шароитлар яратиш, жаҳон бозорида рақобатбардош тайёр маҳсулотлар ишлаб чиқариш ҳажми ва турини кенгайтиришга қаратилган кенг кўламли ишлар амалга оширилаётир.
Аҳоли ва соғлиқни сақлаш муассасаларини арзон дори воситалари, тиббиёт буюмлари билан таъминлашни яхшилашга қаратилган қатор ишлар амалга оширилмоқда. Хусусан, Президентнинг 2017 йил 7 ноябрдаги «Фармацевтика тармоғини бошқариш тизимини тубдан такомиллаштириш чора-тадбирлари тўғрисида»ги фармонига мувофиқ фармацевтика тармоғини ривожлантириш агентлиги ташкил этилди.
Республикада 7 та фармацевтика эркин иқтисодий зоналар фаолияти йўлга қўйилди, зоналарга хорижий ва маҳаллий инвесторларнинг жалб этилган ҳолда лойиҳаларни амалга ошириш бошланди.
Жорий йилнинг 15 декабрь ҳолатига 679,14 миллиард сўмлик 28 та инвестиция лойиҳаси фойдаланишга топширилиб, уларнинг 7 таси ЭИЗларда фаолият кўрсатмоқда. 2018 йил якунига қадар қўшимча 134,47 миллиард сўмлик 9 лойиҳа ишга туширилиши кўзда тутилган.
Ҳозирда соҳада жами 153 та корхона фаолият юритмоқда, шунингдек, 8 та корхона лицензия олиш жараёнида. Жорий йилда ишлаб чиқариш суръатининг ўсиши ўтган йилга нисбатан 125 фоизни ташкил этиб, маҳаллий дори воситалари нархларининг ўртача 10 фоизга пасайишига эришилди.
2018 йилнинг ўтган 11 ойи давомида фармацевтика маҳсулотлари экспорт ҳажми 18,6 миллион АҚШ долларини ташкил этиб, ўтган йилнинг шу даврига нисбатан 109,5 фоизга ўсди.
Жумладан, Республикада жами 2 минг 229 та ижтимоий дорихона ташкил этилди. Ижтимоий аҳамиятга эга 113 турдаги дори воситалари ва 7 турдаги тиббиёт буюмлари рўйхати тасдиқланди. Мазкур дори воситалари ва тиббиёт буюмларини сотиш уларнинг сотиб олиш қиймати ёки улгуржи нархига 10 фоиз чекланган савдо устамаси қўлланилган ҳолда амалга оширилиши йўлга қўйилди.
Дори воситалари ва тиббиёт буюмларини давлат рўйхатидан ўтказиш тизимини такомиллаштириш бўйича юқори тартибга солувчи талаблар қўйилган мамлакатларда рўйхатдан ўтказилган дори воситаларини рўйхатдан ўтказиш натижаларини тан олиш тартиби йўлга қўйилди.
20 та етакчи хорижий давлатда рўйхатдан ўтказилган дори воситалари республикада қўшимча текширувларсиз олиниши йўлга қўйилди. Рўйхатдан ўтказиш муддати 250 дан 155 календар кунига, талаб этиладиган ҳужжатлар сони 78 тадан 66 тага, ундириладиган йиғим миқдори эса 5 минг АҚШ долларидан 3 минг 595 АҚШ долларига қисқартирилди.
«Яхши ишлаб чиқариш амалиёти – GMP» давлат стандарти халқаро стандартлар билан мувофиқлаштирилган. Ўзбекистон Республикасига Европа дори воситалари директорати кузатувчиси мақоми берилди.
Субстанцияларни бир марталик олиб кириш амалиётига чек қўйилиб, уларни рўйхатдан ўтказиш тизими жорий этилди. Натижада жорий йил бошидан 316 турдаги хорижий хом ашё (субстанция) давлат руйхатидан ўтказилди ҳамда ишлаб чиқарилиши йўлга қўйилди.
Инновацион ривожланиш вазирлиги билан ҳамкорликда фармацевтика соҳасида янги технологиялар ва маҳсулотларни яратиш дастури лойиҳаси ишлаб чиқилди. Давлат соғлиқни сақлаш муассасаларида фойдаланилаётган тиббиёт ускуналари инвентаризациядан ўтказилиб, мавжуд 136 мингдан ортиқ тиббий техникадан 3,8 мингтаси таъмирталаб ва 3,7 мингтаси фойдаланишга яроқсиз ҳолатда эканлиги аниқланди.
Тиббиёт ускуналаридан фойдаланиш соҳасида аниқланган муаммоларни бартараф этиш юзасидан чора-тадбирлар ишлаб чиқилган. Бу каби саъй-ҳаракатлар аҳолига тиббий хизмат кўрсатиш, уларни сифатли дори-дармон билан таъминлаш имкониятини кенгайтиради.
Изоҳ (0)