Эркин иқтисодий зоналар фаолиятини мувофиқлаштириш ва бошқариш тизимини янада такомиллаштириш чора-тадбирлари тўғрисида Президент фармони қабул қилинди.
Фармонга мувофиқ, инвестиция лойиҳаларини амалга ошириш учун ер майдонлари ажратиш, туман (шаҳар) ҳокимининг ер майдонларини ажратиш тўғрисидаги алоҳида қарорисиз, маъмурий кенгашларнинг инвестиция лойиҳаларини танлаш ва амалга ошириш учун эркин иқтисодий зоналар ҳудудида жойлаштириш тўғрисидаги баённомалари билан расмийлаштирилади;
Эркин иқтисодий зоналар ҳудудида инвестиция лойиҳаларини жойлаштиришнинг шарти сифатида фаолият бошланганидан кейин иккинчи молиявий йили якунларига кўра икки йил давомида йиллик ишлаб чиқарилган маҳсулотнинг 25 фоизидан кам бўлмаган, кейинги йилларда 50 фоиздан кам бўлмаган миқдорда экспорт қилиш белгиланади. Мазкур шартлар бажарилмаган тақдирда, тадбиркорлик субъектининг эркин иқтисодий зонаси иштирокчиси мақоми ҳамда аввал тақдим этилган имтиёзлар бекор қилинади;
Эркин иқтисодий зоналар ҳудудида инвестиция лойиҳасини амалга ошириш бўйича маъмурий кенгашлар томонидан қарорлар бизнес-режалар ва техник-иқтисодий асосларга Президент ҳузуридаги Лойиҳа бошқаруви миллий агентлигининг «Лойиҳалар ва импорт контрактларини комплекс экспертиза қилиш маркази» ДУКнинг ижобий хулосаси мавжуд бўлган тақдирда қабул қилинади;
Эркин иқтисодий зоналар қатнашчиларига берилган имтиёзлар фақат эркин иқтисодий зоналар ҳудудида ишлаб чиқарилган маҳсулотларга татбиқ этилади;
Эркин иқтисодий зоналарнинг бош режалари маъмурий кенгашлар томонидан Қурилиш вазирлиги ва Инвестициялар бўйича қўмита билан келишилган ҳолда тасдиқланади;
Эркин иқтисодий зоналар дирексияларининг директорларини тайинлаш ва лавозимидан озод этиш маъмурий кенгашлар томонидан Вазирлар Маҳкамаси билан келишилган ҳолда амалга оширилади;
Вазирлар Маҳкамаси ҳар чоракда дирексия раҳбарларининг маъқулланган инвестиция лойиҳаларининг амалга оширилиши бўйича ҳисоботларини эшитади.
Вазирлар Маҳкамасига бир ой муддатда «Навоий» эркин иқтисодий зонаси фаолиятини энг яхши жаҳон тажрибасига асосланган ҳолда такомиллаштириш бўйича норматив-ҳуқуқий ҳужжат лойиҳасини киритиш топширилди.
Изоҳ (0)