Нукус шаҳрида Республикадаги умумтаълим мактаблари, академик лицей ва касб-ҳунар колежлари ўқувчилари, олий таълим муассасалари талабалари ҳамда Мудофаа вазирлиги ҳарбий хизматчилари ва ҳуқуқни муҳофаза қилиш органлари ходимлари иштирокида марафон ўтказилди. Бу ҳақда Мудофаа вазирлиги матбуот хизмати «Дарё»га маълум қилди.
3, 5 ва 10 километр масофага югуриш бўйича ўтказилган спорт марафонида 600 нафардан ортиқ ўқувчи-ёшлар ва ҳарбий хизматчилар иштирок этди.
Марафон натижасида мактаб ўқувчилари ўртасида 3000 метрга югуриш бўйича ғолибликни Нукус ихтисослаштирилган олимпия заҳиралари мактаб-интернати ўқувчиси Шаропат Назарова, лицей ва коллеж ўқувчилари ўртасида 5000 метрга югуришда Жаҳонгир Раҳимбаев, олий таълим муассасалари ўртасида Нукус Давлат педагогика институти талабаси Қуатжан Абдимуратов биринчиликни қўлга киритди.
Ҳарбий хизматчилар ва ҳуқуқни мухофаза қилувчи органлар ходимлари ўртасида фахрли биринчи ўринни Шимоли-ғарбий ҳарбий округи ҳарбий хизматчиси Сардор Йўлчиев ҳамда Миллий гвардия ҳарбий хизматчиси Бобошер Мавлонов эгаллади.
Марафон якунлари бўйича барча ғолиб ва совриндорлар Қорақалпоғистон Республикаси Вазирлар Кенгаши томонидан диплом ва қимматбаҳо совғалар билан тақдирланди.
Шунингдек, бугунги кунда ёшларни ўз Ватанига муҳаббат ва садоқат руҳида тарбиялаш, уларда миллий ғурур ва ифтиҳор туйғуларини шакллантириш масаласида Шимоли-ғарбий ҳарбий округи қўмондонлиги ташаббуси билан Қорақалпоғистон Республикасининг бир қатор туманларига қарашли олис овулларида истиқомат қилувчи ёшлар учун I.В.Савиский номидаги Қорақалпоқ давлат санъат музейига экскурсия уюштирилди.
Экскурсия давомида ёшлар жаҳонда ўз нуфузи ва ўрнига эга бўлган музейнинг бой экспонатлари билан танишди, қорақалпоқ элида ижод қилган мусаввирларнинг ишлари, юрт тарихига оид билимларини янада оширишди.
Изоҳ (0)