Бугун, 21 декабрь куни Фарғона шаҳридаги «Тадбиркорлар маркази»да вилоят ҳокими Шуҳрат Ғаниев 500 дан ортиқ тадбиркорлар билан учрашди. Бу ҳақда Фарғона вилояти Давлат солиқ бошқармаси ахборот хизмати хабар берди.
Мазкур семинар солиқ сиёсатини такомиллаштириш концепцияси мазмун-моҳиятини яна бир бор тадбиркорларга етказиш, улар билан фикр алмашиш мақсадида Фарғона вилояти Давлат солиқ бошқармаси томонидан ташкил этилди.
Тадбирни очиб берган Шуҳрат Ғаниев 1990 йиллардаги ўзининг тадбиркорлик фаолияти билан ўртоқлашиб, у пайтларлаги тадбиркорлик муҳити билан бугунги кундагисини ер-у, осмонча фарқи борлигини, янги лойиҳалар яратаётганга дарвозалар кенг очилаётганлигини таъкидлади. Шунингдек, вилоятда тадбиркорларни газета ва журналларга мажбурий обуна қилинишига йўл қўйилмаётганлигини, агар у ўқимишли босма нашр бўлса, газетхон уни ўзи топиб ўқишини алоҳида қайд этди.
Бундан ташқари, айни пайтда тадбиркорлик билан шуғулланиш, қўшимча иш ўринлари яратиш давр талаби эканлиги, вилоят ҳокими ҳатто ўзи ҳам узум экспорти билан шуғуланишини ҳақида ўртоқлашди. Шу билан бирга, вилоятда куни келиб йиллик товар айланмаси 20—30 миллион АҚШ доллари бўлган тадбиркорлар сони ортишига ишончи комиллигини таъкидлади.
Тадбирда маърузачилар томонидан солиқ сиёсатини такомиллаштириш концепциясига асосан Фарғона вилоятида фаолият юритаётган юридик ва жисмоний шахслар ҳаётида бир қатор ижобий ўзгаришлар бўлиши кутилаётгани айтиб ўтилди:
а) давлат мақсадли жамғармаларига юридик шахсларнинг обороти (тушуми)дан ундириладиган 3,2 фоизли мажбурий ажратмаларни бекор қилиниши натижасида вилоятда фаолият юритаётган тадбиркорларнинг ихтиёрида қоладиган фойда 115,7 миллиард сўмни ташкил этиши;
б) юридик шахслардан олинадиган фойда солиғи ставкаси 14 фоиздан 12 фоизга (тижорат банклари учун 22 фозидан дан 20 фоизга) пасайтирилиши натижасида юридик шахсларининг соф фойдаси 4,0 миллиард сўмга ошиши;
с) 8 фоизли суғурта бадалининг бекор қилиниши натижаси вилоят фуқароларининг ихтиёрида 371,6 миллиард сўм маблағ қолиши;
е) дивидендлар ва фоизлар кўринишидаги даромадлар бўйича тўлов манбаидан ушлаб қолинадиган фойда солиғи ставкаси 10 фоиздан 5 фоизга пасайтирилмоқда, натижада, тадбиркорларнинг реал даромадлари вилоят бўйича 7,7 миллиард сўмга ошиши кутилмоқда.
Изоҳ (0)