Қорақалпоғистондаги «D.D.» МЧЖ 431 та фермер хўжалигига 3 миллиард 148 миллион сўмлик кўчат етказиб бермагани, ушбу маблағлар фермер хўжаликлари ҳисобига қайтарилмасдан, ўзлаштириш ва растрата қилиш йўли билан талон-торож этилгани аниқланди. Бу ҳақда Бош прокуратура ҳузуридаги инспекцияга таяниб, «Turon 24» маълум қилди.
Юқоридаги ҳолатдан кейин 431 та фермер хўжалигининг тижорат банклардан олган кредит маблағлари ҳисобига 31 миллиард сўмдан ортиқ кредит қарздорлиги юзага келган.
Бундан ташқари, «D.D.» МЧЖ мансабдор шахслари Тўрткўл, Беруний, Элликқалъа ва Амударё туманларида томорқа ер эгалари билан кўчат етиштириб бериш юзасидан шартнома тузиб, 352 нафар кўчат етиштириб берувчига жами 2 миллиард 619 миллион сўм тўлаб бермагани айтилмоқда.
Мазкур ҳолат юзасидан «D.D.» МЧЖ мансабдор шахсларига нисбатан Жиноят кодексининг тегишли моддалари билан жиноят иши қўзғатилиб, Қорақалпоғистон прокуратурасига юборилган.
Изоҳ (0)