Фарғона вилоятининг Тошлоқ туманида янги савдо мажмуаси ва деҳқон бозори фойдаланишга топширилди. Бу ҳақида «Дарё» мухбири Азизжон Эрматов хабар берди.
Замонавий, ёпиқ типдаги савдо мажмуаси ҳамда деҳқон бозори қурилишига 3,2 миллиард сўмдан зиёд маблағ сарфланиб, бу ерда сотувчи ва харидорлар учун қатор қулайликлар яратилди.
Бутунлай қайта реконструкция қилинган деҳқон бозорида гўшт, сут, балиқ маҳсулотлари павильонлари, озиқ-овқат, қуруқ мева, нон, ҳунармандлик буюмлари дўконлари ташкил этилди. Янги расталарда қишлоқ хўжалиги маҳсулотларини сифатини сақлаган ҳолда сотиш учун барча қулайлик яратилган.
Савдо мажмуасида озиқ-овқат, ноозиқ-овқат ва гўшт маҳсулотлари сотиш учун махсус қурилган савдо майдончаларида 35 тадбиркор иш бошлади. Деҳқон бозори ҳудудида 100 нафар тадбиркорга қишлоқ хўжалик маҳсулотлари билан савдо қилиш учун расталар ажратиб берилди.
Тошлоқ тумани ҳокимлигидан маълум қилишларича, савдо мажмуасида фермер хўжаликлари ташаббуси билан ташкил этилган гўшт растасида мол гўшти арзонлаштирилган нархда, 33 минг сўмдан 35 минг сўмгача сотилмоқда. Байрам ярмаркасида эса аҳоли эҳтиёжи учун зарур бўлган маҳсулотлар ёғ, гуруч, картошка, пиёз, сабзи, олма, анор, нок, банан, мандарин, киви сингари мевалар арзонлаштирилган нархларда савдога қўйилган.
Изоҳ (0)