«Ўзбекистон темир йўллари» АЖ 11 декабрдан Қозон – Тошкент йўналишидаги дастлабки тўғридан-тўғри поезд қатновини йўлга қўяди. Бу ҳақда Turon24 хабар бермоқда.
«Ўзтемирйўлйўловчи» АЖ мурожаатлар билан ишлаш сектори бошлиғи Фозилбек Машариповнинг маълум қилишича, Тошкент – Екатеринбург йўналишидаги йўловчи поезди Россиянинг Қозон шаҳригача қатновни амалга оширади.
Қозон – Тошкент йўналишидаги поезд Татаристон пойтахтидаги «Қозон-1» вокзалидан соат 23:55 да йўлга чиқади ва соат 5:00 да Тошкентга кириб келади (йўлда 3 сутка 3 соат 5 дақиқа юради, жами 75 соат).
Белгиланган жадвалга кўра Қозон – Тошкент ва Тошкент – Қозон йўналишларида поездлар ҳафтасига бир мартадан қатнайди. Поезд шанба кунлари соат 3:50 да Тошкент марказий вокзалидан йўлга чиқиб, сешанба куни Қозон шаҳрига етиб боради ва шу куннинг ўзида соат 23:55 да Қозон – Тошкент йўналиши бўйича ҳаракатланади.
Ҳозирча чипталарни фақат темирйўл кассаларидан сотиб олиш мумкин.
Изоҳ (0)