Ўзбекистонда 8—10 декабрь кунлари қишлоқ хўжалиги ходимлари куни ва Ҳосил байрамини нишонлаш режалаштирилган, дея хабар бермоқда ЎзА.
Тадбирлар 8 декабрь Сурхондарё вилоятида бошланган. Қорақалпоғистон Республикаси, Андижон, Бухоро, Жиззах, Қашқадарё, Навоий, Самарқанд, Сирдарё, Хоразм, Фарғона, Тошкент вилоятларида байрам тадбирлари ва оммавий сайллар 9 декабрь кунига белгиланган. Наманган вилояти қишлоқ хўжалиги ходимлари эса 10 декабрда байрам қилади.
Мавзуга доир: Президент Шавкат Мирзиёев Ўзбекистон деҳқон ва фермерларига табрик йўллади, Шавкат Мирзиёев бир гуруҳ қишлоқ хўжалиги соҳаси ходимларини мукофотлади
Самарқанд вилоятида эса туман ҳокимларининг қишлоқ ва сув хўжалиги масалалари бўйича ўринбосарларига Chevrolet Niva русумли хизмат автомашиналари топширилади.
Бу каби байрам ва тақдирлаш бошқа вилоятларда ҳам бўлиб ўтади. Хусусан, 10 мингдан ортиқ ходим, меҳнат фахрийлари, олим ва мутахассислар, илғор фермер хўжаликлари раҳбарлари ва ишчи ходимларга вазирлик ва идораларнинг кўкрак нишонлари, маҳаллий давлат ҳокимият органларининг «Фахрий ёрлиқ» ва «Ташаккурнома»лари, қимматли совғалар топширилади.
Байрам тадбирларида таниқли санъаткорлар ва сўз усталари иштирокида маданий дастурлар ишлаб чиқилган бўлиб, ҳар бир ҳудудда бу тадбирлар ўз анъаналаридан келиб чиққан ҳолда ўтказилади. Барча ҳудудларда миллий ўйинлар — улоқ-кўпкари, кураш мусобақалари ташкил этилади.
Байрам тадбирларини юқори савияда ўтказиш мақсадида шаҳар ва туманларда улгуржи савдо базалари ҳамда деҳқон бозорлари аҳолига арзонлаштирилган қишлоқ хўжалиги маҳсулотлари ярмаркалари ташкил этади.
Изоҳ (0)