Шавкат Мирзиёев бир гуруҳ қишлоқ хўжалиги соҳаси ходимларини мукофотлади

Ўзбекистон Президенти Шавкат Мирзиёев 8 декабрь куни «Қишлоқ хўжалиги ходимлари куни муносабати билан соҳа ривожига муносиб ҳисса қўшган юртдошларимиздан бир гуруҳини мукофотлаш тўғрисида»ги фармонни имзолади. Фармон матни ЎзАда эълон қилинди.

Президент бир гуруҳ фуқароларни «кўп йиллик фидокорона меҳнати билан мамлакатимизнинг иқтисодий қудрати ва экспорт салоҳиятини янада мустаҳкамлаш, қишлоқ хўжалиги соҳаси ривожини янги босқичга кўтариш ва уни комплекс модернизация қилиш, соҳага инновацион технологиялар, замонавий илм-фан ютуқларини, кластер тизимини кенг жорий этиш, озиқ-овқат хавфсизлигини таъминлаш, барча турдаги қишлоқ хўжалиги экинларидан юқори ва сифатли ҳосил етиштириб, эл-юрт фаровонлигини юксалтириш, дастурхонларимиз тўкинлигини таъминлашга қўшган муносиб ҳиссаси, аграр секторда ислоҳотларни, давлат дастурларини муваффақиятли амалга ошириш, ер ва сув ресурсларидан оқилона фойдаланиш, экин майдонларининг мелиоратив ҳолатини яхшилаш борасидаги катта хизматлари ҳамда ижтимоий ҳаётдаги фаол иштироки учун» мукофотлаган.

Хусусан, икки киши «Ўзбекистонда хизмат кўрсатган қишлоқ хўжалиги ходими», бир киши «Ўзбекистонда хизмат кўрсатган ирригатор», бир киши «Ўзбекистонда хизмат кўрсатган чорвадор» фахрий унвонлари билан, уч киши «Фидокорона хизматлари учун» ордени, 14 киши «Меҳнат шуҳрати» ордени билан, 15 киши «Дўстлик» ордени билан, 21 киши «Шуҳрат» медали билан мукофотланди.