5 декабрнинг асосий янгиликлари «Дарё» дайжестида.
Россиянинг Волгоград вилоятидаги Бахтияровка қишлоғида чорвачилик фермасида Ўзбекистон фуқароси тожикистонлик ҳамкасбининг бошини кесиб ташлади. Жиноят изларини яшириш учун у марҳумнинг бошини кесиб олиб, печга ташлаган, танасини эса оғилхонадан ташқарига чиқариб, пичан ғарамига яшириб қўйган. Ҳамкасбининг бошини печга ташлашини у марҳумнинг ундан кўз узмай туриши асабига теккани билан изоҳлаган.
***
Coscom (Ucell бренди) мобил операторининг 94 фоиз акцияларига эгалик қилувчи Telia швед-фин компанияси ўзининг барча улушини 215 миллион доллар эвазига Ўзбекистон Давлат рақобат қўмитасига сотди. Мобил операторга аввал Uzmobile миллий оператори директори бўлиб ишлаган Владимир Кравченко раҳбарлик қилади.
***
Бирлашган Араб Амирликларининг вице-президенти Муҳаммад ибн Рашид ал-Мактумнинг қизи Латифа бин Муҳаммад ал-Мактум мамлакатдан қочишга бесамар уринишларидан сўнг, дом-дараксиз йўқолиб қолди. Дубай расмийлари малика ҳақида ҳеч қандай маълумотлар бермаган. Мамлакатдаги манбаларнинг берган маълумотига кўра: «малика ўз оиласи даврасида бахтли ҳаёт кечирмоқда».
***
Самарқанд вилоятининг Жомбой тумани фермер хўжаликлари 585 га ерда 5500 тонна аччиқ қалампир етиштирди, аммо ушбу ҳажмдаги қалампирга харидор топилмади. Фермерлар ўзи етиштирган маҳсулотларини Жануби-Шарқий Осиё ва Европа мамлакатларига экспорт қилишни режалаштирганди. Аммо импортер мамлакатларга ушбу маҳсулотни олиб киришга вақтинча тақиқ қўйилганлиги сабабли гармдорига бўлган талаб сусайди.
***
Ҳукумат қарори билан Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиш тартиби тўғрисидаги низом тасдиқланди. Унга кўра, белгиланмаган асослар бўйича транспорт воситаларини тўхтатиб текшириш тақиқланди.
Изоҳ (0)