2018 йил 26 ноябрь куни жиноят ишлари бўйича Хоразм вилоят суди раиси Б.Умаров томонидан Урганч ахборот ва компьютер технологиялари касб-ҳунар коллежи биносида очиқ сайёр суд мажлиси ўтказилди. Бу ҳақда Жиноят ишлари бўйича Хоразм вилоят суди «Дарё»га маълум қилди.
1985 йил 14 февраль куни Хоразм вилоятининг Ҳазорасп туманида туғилган Ж.Г. диний экстремизм, ақидапарастлик ғоялари билан йўғрилган ҳамда диний адоватни тарғиб қилувчи материалларни Интернет тармоғи орқали олиб, тарқатиб келганликда айбланган.
Хусусан, Ж.Г. Россия Федерациясида ишлаб келиш жараёнида, ўзига тегишли бўлган телефони ёрдамида Интернет жаҳон ахборот тармоғи орқали диний экстремистик ва ақидапарастлик ғоялари билан йўғрилган ва ушбу ғояларни тарғиб қилувчи «Салафийлар» террорчилик ташкилотининг материалларини, шу жумладан жамоат хавфсизлиги ва жамоат тартибига таҳдид соладиган маъруза ва видеороликларни қариндошларига жўнатиш орқали тарқатиш билан шуғулланиб келган.
Суд ҳукмига кўра, Ж.Г.нинг айбига иқрорлиги, қилмишидан пушаймонлиги, оилавий аҳволи, муқаддам судланмаганлиги, яшаш жойидан ижобий тавсифланганлиги ҳамда унга нисбатан озодликдан маҳрум қилиш билан боғлиқ бўлмаган жазо тайинлашни сўраб берган кафолат хати инобатга олиниб, Ж.Г.га Ўзбекистон Республикаси ЖК 2441-моддаси (Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисмининг «г» банди билан ЖКнинг 57-моддаси қўлланилиб, 4 йил муддатга озодликни чеклаш жазоси тайинланиб, суд залидан дарҳол қамоқдан озод қилинган ҳамда унга нисбатан муайян, яъни миллий, ирқий, этник ёки диний адоватни тарғиб қилувчи материалларга эга бўлмаслик, шу жумладан Интернет алоқа воситаларидан фойдаланмаслик каби тақиқлар белгиланди.
Таъкидланишича, 2018 йилнинг 10 ойи давомида жиноят ишлари бўйича Хоразм вилоят судлари томониданЁшлар иттифоқи, «Маҳалла» хайрия жамоат фонди, хотин-қизлар қўмитаси ва бошқа органларнинг кафолат хатига асосан 134 жиноят иши бўйича 176 нафар шахс суд залида қамоқдан озод этилган.
Изоҳ (0)