Фуқаролар Тошкентдаги яроқсиз ҳолатга келиб қолган Фарғона йўли кўчасини таъмирлашни сўрамоқда (фото)

«Дарё» нашрига тошкентлик фуқаро Ғаниев Расулжондан мурожаат келиб тушди. Унда пойтахтнинг Фарғона йўли кўчаси автотранспорт воситалари юриши учун яроқсиз ҳолатга келиб қолгани, уни таъмирлаш зарурлиги айтилади. Мурожаатномани тўлиғича келтириб ўтамиз.

«2018 йил ноябрь ойи бошларида Тошкент шаҳри Яшнобод туманидаги Мухтор Ашрафий ва Алимкент кўчалари кесишган жойида автомобиль йўли бир неча йиллардан бери жуда ёмон аҳволда эди, бу ҳолат бўйича фуқаролар «Дарё»га мурожаат қилишган эди. «Дарё» таҳририятида ушбу ҳолат танқидий  ёритилгандан сўнг маҳаллий ҳокимият маъсул ходимлари томонидан тезкор тартибда, яъни «Дарё»да ёритилгандан 2 кун ўтиб неча йиллардан бери асфальт кўрмаган йўллар асфальт қилиниб текислаб қўйилди. Мана, ҳозирги кунда ҳайдовчилар қийналмасдан юрмоқда.

Мен Сизга мурожаат қилишимдан мақсад, яна бир шу каби ҳолатга эътиборингизни қаратмоқчиман. Мана неча йилдирки, Миробод ва Яшнобод туманлари чегарасида жойлашган Фарғона йўли кўчаси таъмирталаб бўлиб қолган. Биз оддий фуқаролар яхши орзу-ниятларда сотиб олган автотранспортлар, давлат бюджети ҳисобидан харид қилинган йўловчи ташиш автобуслари ва бошқа техникаларнинг техник ҳолатига жудаям салбий таъсир қилмоқда. Биз фуқаролар иложи борича ўша кўчадан юрмасликка ҳаракат қиламиз, лекин мажбурмиз. Такси тўхтатиб ўша ҳудудга буюртма берсангиз, у томонда йўллар ёмонлиги сабабли юрмаслигини ёки қиммат нархларда хизмат кўрсатишини билдиришади.

Яқинда маҳаллий телевидение орқали ҳам бу мавзуда танқидга учраганда маъсул шахслар Фарғона йўли кўчасида таъмирлаш ишларини бошлашганлигини айтиб, қисқа кунлар ичида «пойтахт марказий кўчаларидан бири бўлган» ушбу кўчанинг капитал таъмирланиб фойдаланиш учун топширилишини билдиришди. Лекин, мана бир ойдирки, ҳеч қанақа таъмирлаш ишлари олиб борилмаяпти.

Олдинда қаҳратон қиш, оддий халқ шундай кунларда шу кўчада автотранспорт бузилиб моддий ва маънавий зарар кўрмаслигини таъминлаш мақсадида, Сиздан фуқаролар, шахсий мулк эгалари, кўпчилик ҳайдовчилар номидан шу ҳолат юзасидан мурожаатимиз тегишли маъсул шахсларга етиб боришида ва ижобий ҳал бўлишида амалий ёрдам беришингизни илтимос қилиб қоламан», — дейилади мурожаатномада.

Ҳолат юзасидан фотосуратлар илова қилинди.