Аввал хабар берганимиздек, Шавкат Мирзиёев 27 ноябрь куни БМТ собиқ бош котиби, бугунги кунда Яшил тараққиёт глобал институти ассамблеяси ва Халқаро олимпия қўмитасининг Этика бўйича комиссиясига раҳбарлик қилаётган Пан Ги Мунни қабул қилди. Меҳмон учрашувдан кейин ЎзА мухбири билан мулоқотда бўлди.
– Суҳбатимиз давомида кўплаб масалаларни муҳокама қилдик. Ўзбекистон Президентининг мамлакатда кенг миқёсли ислоҳот ва янгиланишлар дастурини бошлаш бўйича ташаббусларини тўлиқ қўллаб-қувватлаймиз.
Халқаро ҳамжамият Ўзбекистоннинг қўшни Афғонистонда тинчлик ва хавфсизликни таъминлашга қўшаётган ҳиссасини қадрлайди. Бугунги кунга қадар Шавкат Мирзиёев ташаббуси билан афғон масаласига бағишланган икки нуфузли халқаро форум ташкил этилгани буни тасдиқлайди. Ўзбекистоннинг қўшни мамлакатлар билан чегара билан боғлиқ масалаларни ҳал этиш борасидаги дипломатик саъй-ҳаракатлари ҳам эътиборга молик.
Президент билан учрашувда, шунингдек, Ўзбекистон ва Корея Республикаси ўртасидаги стратегик шериклик муносабатларини ривожлантириш масалаларини муҳокама қилдик.
Орол фожиаси миқёси ва кўламига кўра энг даҳшатли экологик фалокатдир. 2010 йил апрель ойида Оролбўйига борганимда жуда аянчли манзаранинг гувоҳи бўлган эдим. БМТнинг кўплаб мажлисларида ҳар сафар ушбу фожиани бартараф этиш масаласини кўтаришга ҳаракат қилдим.
Охирги марта Ўзбекистонга 2015 йилда келган эдим. Уч йил ўтиб, бу ерда кенг миқёсли ўзгаришлар рўй берганига гувоҳ бўлдим.
Изоҳ (0)