Шу вақтга қадар миллий ҳайдовчилик гувоҳномаларини янги намунадаги ҳайдовчилик гувоҳномаларига алмаштириш давлат хизмати тажриба-синов тариқасида Тошкент шаҳрининг Миробод, Учтепа, Шайхонтоҳур ва Юнусобод туманлари Давлат хизматлари марказлари орқали соддалаштирилган тартибда аҳолига кўрсатиб келинмоқда эди.
Ўзбекистон Республикаси Ички ишлар вазирлиги Ахборот технологиялари, алоқа ва ахборотни ҳимоялаш бошқармаси ҳамда Тошкент шаҳар Ички ишлар Бош бошқармаси кўмагида янги намунадаги ҳайдовчилик гувоҳномаларини чоп этиш учун зарур бўлган замонавий технологиялар жалб этилиб, 2018 йилнинг 26 ноябридан бошлаб Мирзо Улуғбек, Яккасарой ва Яшнобод туман Давлат хизматлари марказларида янги намунадаги ҳайдовчилик гувоҳномаларини алмаштириш йўлга қўйилди.
2019 йилнинг 1 январига қадар, мазкур давлат хизматини Тошкент шаҳридаги барча Давлат хизматлари марказларида йўлга қўйиш, шу билан бирга аризаларни Ягона интерактив давлат хизматлари портали орқали мустақил равишда юбориш имкониятини яратиш режалаштирилмоқда.
Эслатиб ўтамиз, Давлат хизматлари марказлари орқали миллий ҳайдовчилик гувоҳномасини янги намунадаги ҳайдовчилик гувоҳномасига алмаштириш давлат хизмати 2021 йилнинг 1 январига қадар соддалаштирилган тартибда амалга оширилади. Мазкур давлат хизматидан фойдаланиш учун фуқароларимиз паспорт ва эски намунадаги ҳайдовчилик гувоҳномаси ҳамда унинг талони, шунингдек ЭКОИҲнинг 70%и миқдорида тўлов амалга оширилганлигини тасдиқловчи ҳужжатларни тақдим этишлари талаб этилади.
Сиздан ортиқча ҳужжатлар талаб этилганда Давлат хизматлари агентлигининг 1148 қисқа рақамли «Ишонч телефони»га мурожаат этишингиз сўралади.
Изоҳ (0)