АҚШнинг БМТдаги доимий вакили Никки Хейли Азов ва Қора денгизлардаги вазият юзасидан БМТ Хавфсизлик кенгаши шошилинч мажлиси 26 ноябрь, душанба куни маҳаллий вақт билан 11:00 (Тошкент вақти билан 21:00)да бўлиб ўтишини тасдиқлади, деб ёзади «Интерфакс». Бу ҳақда дипломат ўз Twitter’ида ёзди.
Аввалроқ БМТ Хавфсизлик кенгаши мажлиси ҳақида Россиянинг ташкилотдаги доимий вакили маълум қилган эди.
«Азов денгизидаги вазиятнинг хавфли тус олиши ва унинг ортидан юз берган воқеалар муносабати билан Россия 26 ноябрь куни эрталаб кун тартибининг «Халқаро тинчлик ва хавфсизликни қўллаб-қувватлаш» банди бўйича Хавфсизлик кенгаши очиқ мажлисини ўтказишни сўради», — деган эди Россиянинг БМТдаги доимий вакили ўринбосари Дмитрий Полянский.
Эслатиб ўтамиз, Украина президенти Пётр Порошенко мамлакат Миллий хавфсизлик ва мудофаа кенгаши мажлисида Украинада ҳарбий ҳолат эълон қилишни таклиф этди.
Изоҳ (0)