Тошкентда Соғлиқни сақлаш вазирлиги, Жаҳон соғлиқни сақлаш ташкилоти (ЖССТ)нинг Европа минтақавий бюроси ва ЖССТнинг Ўзбекистондаги ваколатхонаси ҳамкорлигида «Барқарор ривожланиш мақсадлари даврида Ўзбекистонда соғлиқни сақлашни ислоҳ қилиш» мавзусида халқаро конференция ташкил этилди. Соғлиқни сақлаш вазирлиги ахборот хизматидан маълум қилишларича, унда ҳукумат вакиллари, ЖССТ экспертлари ва жамоат ташкилотлари мутасаддилари иштирок этди.
Ушбу конференция Ўзбекистонда соғлиқни сақлашни комплекс ислоҳ қилиш ва 2030 йилгача барқарор ривожланиш мақсадларига эришишда кўмаклашувчи узоқ муддатли стратегик дастур — Соғлиқни сақлаш тизимини ривожлантириш концепциясини татбиқ этиш мақсадида ташкил этилди.
Унда соғлиқни сақлашни ислоҳ қилиш бўйича 2025 йилгача мўлжалланган 7 йиллик ривожлантириш концепцияси мазмун-моҳияти ҳам муҳокама қилинди. Жумладан, соғлиқни сақлашнинг бошқариш ва молиялаштириш тизимини тубдан такомиллаштириш, тиббий суғуртани жорий қилиш, давлат-хусусий шерикчилик ва тиббий туризмни ривожлантириш, шунингдек, кадрлар тайёрлаш, уларнинг малакасини ошириш ва тиббиёт фанини ривожлантириш каби устувор йўналишларга эътибор қаратилди.
Бундан ташқари, бирламчи тиббий ёрдамни кучайтириш, аҳоли соғлигини мустаҳкамлаш ва фаровонлигини ошириш йўлида барча давлат ва жамоат ташкилотларининг ҳамкорлиги муҳим аҳамият касб этиши айтиб ўтилди. Конференцияда сўзга чиққат ЖССТнинг Европа минтақавий бюроси директори Жужанна Якаб тиббиётни ислоҳ қилишга қаратилган мазкур концепцияга эътибор қаратиб, соҳага кўрсатилаётган улкан эътибор учун Ўзбекистон раҳбариятига миннатдорчилик билдирди.
Шунингдек, Жаҳон соғлиқни сақлаш ташкилоти Ўзбекистон тиббиётидаги тизимли ислоҳотларни тўла қўллаб-қувватлаган ҳолда, ушбу амалга оширилаётган ислоҳотлар кўплаб давлатларга намуна бўла олишини эътироф этди. Жумладан, иммунизация ёки вакцинация борасидаги ишларга қаратилаётган эътибор, ҳаттоки, Европанинг ривожланган мамлакатларида ҳам амалга оширилмагани айтиб ўтилди.
Соғлиқни сақлаш вазири Алишер Шодмонов ўз чиқишида Ўзбекистон соғлиқни сақлашда барқарор ривожланиш соҳасидаги мақсадларга эришиш ва аҳолини сифатли тиббий хизматлар билан қамраб олиш бўйича мажбуриятларини бажаришда содиқ эканига урғу берди. Тиббиёт тизимини ривожлантириш бўйича янги концепциянинг татбиқ этилиши одамлар саломатлигини янада самарали ҳимоялашга хизмат қилишини айтиб ўтди.
Конференция доирасида Президент маслаҳатчиси Абдужаббор Абдувоҳидов, бош вазир ўринбосари Азиз Абдуҳакимов иштирок этди ва сўзга чиқди.
Изоҳ (0)