Саудиялик журналист Жамол Қошиқчи махсус инъекция ёрдамида ўлдирилган, унинг танаси бўлакларга бўлинган мамлакатнинг Истанбулдаги консуллигидан чиқариб кетилган. Бу ҳақда Саудия Арабистони бош прокурори маълум қилди, деб ёзмоқда «РИА Новости».
Бош прокурорнинг сўзларига кўра, Саудия Арабистонининг Истанбулдаги консуллигига етиб келган гуруҳ раҳбари операция муваффақиятсизликка учраган тақдирда Қошиқчини йўқ қилишга буйруқ берган. Операциянинг мақсади журналистни қиролликка қайтариш бўлган.
Бош прокурорнинг қайд этишича, журналистнинг изидан келган қиролликнинг фуқаролари уни ватанга қайтаришга кўндира олмаган. Қошиқчига гиёҳванд модданинг катта дозаси юборилган ва бу унинг ўлимига сабаб бўлган.
Қошиқчининг танаси қотилликдан кейин қисмларга бўлинган ва консулликдан ташқарига олиб чиқиб кетилган. Бош прокурорнинг сўзларига кўра, жасад «маҳаллий шерик»ка берилган. Унинг фотороботи яратилган ва у Туркия томонига жўнатилади.
Назорат идораси раҳбарининг маълум қилишича, қироллик фуқаролари кирган гуруҳ Саудия Арабистони умумий разведка хизматининг собиқ раҳбари Аҳмад ал-Асирийнинг топшириғига биноан тузилган.
Изоҳ (0)